Pasaiako badia, berriz ere batelen eremu asteburuan
Euskadiko Batel Txapelketa jokatuko da asteburuan badian. Bihar (larunbata) sailkapen estropadak izango dira, eta etzi finalak.
Joan den asteburuko Gipuzkoako txapelketan, batelak lehian badian. Argazkia: San Juan-Koxtape. Gipuzkoako Batel Ligako hainbat estropada, joan den asteburuan Gipuzkoako Batel Txapelketa, eta asteburu honetan Euskadiko Batel Txapelketa. Arraunketako ontzi txikien epizentro izaten jarraituko du Pasaiako badiak asteburuan, beraz. Oarsoaldeko batel asko izango dira lehian. Euskadiko Arraunketa Federazioa eta San Juan-Koxtape Arraun Elkartearen esku izango dira antolaketa lanak.
Bihar (larunbata) igandeko finaletarako sailkapen estropadak egingo dituzte. 16:00etan hasiko dira bogan, adinaren araberako zortzi kategoriatan banatuta, ontzi txikiak. Biharko onenek, igandean izango dituzte finalak; denbora eskasenak egingo dituztenentzako kontsolazio txandak izango dira: 10:00etan hasiko dira horiek guztiak.
Orotara Gipuzkoako eta Bizkaiko 89 batel uretaratuko dira badian bihar-etzi artean. Horietatik asko Oarsoaldeko arraun elkarteetakoak, sei San Juanekoak eta bosna San Pedro nahiz Hibaikakoak. Ondoko taulan, bertako ontzien zerrenda:
- Haurrak, neskak: San Pedro eta Hibaika.
- Haurrak mutilak: San Pedro eta Hibaika.
- Kadeteak, neskak: San Juan, San Pedro eta Hibaika.
- Kadeteak, mutilak: San Juan eta San Pedro.
- Gazteak, neskak: San Juan eta Hibaika.
- Gazteak, mutilak: San Juan, San Pedro eta Hibaika.
- Absolutua, emakumeak: San Juan.
- Absolutua, gizonak: San Juan.
