Zaintza, lehentasun
Dozenaka eta dozenaka herritar atera dira kalera zaharren egoitzetako langileentzat lan baldintza eta erabiltzaileentzat zaintza duina galdegiteko.
Zaintza publiko duina aldarrikatu dute erresidentzietarako. Errenteria-Orereta, berriro, eredugarri. Kalea hartu dute gaur arratsaldean dozenaka eta dozenaka herritarrek zaintza publiko duina galdegiteko, eta herriko bi zaharren egoitzetan bai langileek bai erabiltzaileek jasaten dituzten baldintza negargarriak salatu eta berehalako irtenbidea exijitzeko. Elkarretaratzea deitua zuten gaurko herri eragileek— auzo elkarteek, Bilgune Feministak, Oreretako Mugimendu Feministak, zaharren egoitzetako erabiltzaileen senideek, egoitzetako langileek, eta Duintasuna pentsiodunen elkarteak—. Deialdiak, aurreikuspen gutziak txiki utzi eta elkartutako jende kopurua ikusita manifestazioa egin dute.
Nekatuta, nazkatuta eta kezkatuta. Hala daude. Izan ere, langile zein erabiltzaileen senideek salatu duten bezala, oso baldintza kaxkarretan ari dira langileak zein erabiltzaileak herriko bi adinekoen erresidentzietan. Hori horrela, eta ikusita arduradunek ez dutela bitartekorik jarri egoera hobetzeko, protesten bideari ekin diote. Gaurkoa lehenengo urratsa izanda, eta herriak, berriz ere, indartsu dagoela erakutsi du, eta argi adierazi ez dagoela prest onartzeko inori ere zerbitzu publiko kalitatezkoak kolokan jartzerik. Pankartan, bi egoitzetako langileak, eta bandera feminista ugari jarraian; erabiltzaileen senideak ere protestan. Aldundiaren aurkako oihuak, zaintza duinaren aldekoak, lan baldintza egokien aldarrikapena, eta emakumeen borrokaren aldeko oihuak bide osoan zehar.
Manifestazioaren amaieran, eskerrak eman dizkiete deitzaileek bertaratu diren herritarrei. Txaloka erantzun dute bildutakoek. Bi egoitzetako baldintzak, Sanmarkosenekoak zein Jesusen Bihotza erresidentziakoak “onartezinak” direla azaldu dute, bietan langile falta nabarmena dela esan dute eta plantilla eskasia komuna dela bietan nabarmen jarri, “horrek zailtzen du arreta egokia ematea, baita langileek baldintza duinetan lan egitea ere. Langile gutxiago daude eta horrek gure gurasoek, aiton-amonek arreta egoki bat jaso dezaten oztopatzen du”.
Hitza hartu duen herri eragileen ordezkariak hasitako protesta bidearen gaineko zehaztasunak eman ditu, eta azaldu, bide instituzionala eta mobilizazio bidea zabalduko zituztela jakinarazi zutela, “instituzionalean egin dugu urratsa. Erabiltzaileen senideek aukera izan dute jada Aizpea Otaegi alkatearekin bildu eta egoeraren berri lehen eskutik emateko. Senideek kontatu diote zer sentitzen duten senideak ikustera joaten diren bakoitzean, eta langileek baldintzen berri eman diote. Lotsagarria da bizi dutena. Gainera, datorren astean alderdi politikoekin bilduko gara, eta mozioa ere aurkeztu dugu alderdi politikoek iritzia eman dezaten, eta eska diezaioten arduradun nagusiari, aldundiari, esku hartu dezan konponbidea emateko egoera benetan larria delako”.
Mezu argia gaurkoa, langileen lan baldintzak duindu nahi dituzte, eta aiton-amonen zaintza duindu nahi dute, “aiton-amonak izan ziren zaindu gintuztenak, eta orain guri dagokigu haiek zaintzea berme guztiekin. Ezin dugu onartu gertatzen ari dena”.
Erresidentzietako egoera, zerbitzu publikoen aurka egindako estualdi bat gehiago dela salatu dute, “denbora darama mugimendu feminista aldarrikatzen etengabe zaintza publiko eta komunitarioak, publikoak ekiditen duelako bereizketak sortzea jendartean. Arduratsuak izan behar dugu eta zaintzaren alde borrokatu, herri mugimendutik hasi dugun lanaren lehen urratsa da gaurko hau zaintza lanak duintzeko”. Alderdi politiko guztiei mezua gaurko mobilizazioan: “Agintean dagoena dagoela osasun publikoa zainduko dugu, agintean dagoena dagoela zaintza defendatuko dugu, publikoa lehenengoa da”.
Mobilizatzen jarraitzeko konpromisoa hartu dute bukatzeko, egoera konpondu eta arreta eta lan baldintza egokiak bermatu arte. Herritarrei mobilizazioetan parte hartzeko deia egin diete, baita adi egoteko eskatu, mozioa plenoan lantzen denean udaletxera bertaratzeko.
Txalo artean bukatu dute gaurko protesta, beste behin ere ageri-agerian jarrita Errenteria-Oreretako herri mugimenduak oinarrizkoaren eta bizi baldintza duinen aldeko konpromiso irmoa duela. Iztietako anbulatorioan egoera lehengoratzeko egindako borroka eredugarrian, josi duten eragile sare horrek argi esan zuen soilik herriak salbatzen duela herria; gaurkoa, berriro, horren erakusle garbiena izan da.
