Fanderiako errotak 1.090 bisita jaso ditu 2023an
Ekipamendura egindako bisitak gora egin dute aurreko ikasturtean, baita antolatutako jardueretan parte hartu duten pertsonen kopuruak ere.
Iñaki Azkarate, Yolanda Martin eta Eva Aiestaran gaurko agerraldian. Argazkia: Herri Bizia Fanderiako Errotako Ibaiaren Etxera egindako bistak gora egin zuten iaz. Hala jakinarazi dute gaur agerraldian Yolanda Martin Ingurumen zinegotziak, Mikel Azkarate Ingurumen teknikariak eta Eva Aiestaran Fanderiako Errotaren dinamizatzaileak. Zehazki 1.090 bisita jaso zituen errotak 2022-23 ikasturtean, eta gorakada hori antolatutako jardueretan, ikastetxe bisitetan eta talde bisitetan ere izan da nabaria.
Hilabetero bigarren asteburuan antolatzen ditu bisita gidatuak Fanderiako errotak, eta 328 lagun bertaratu dira iaz horietara. Dinamizatzailearen arabera, gora egin du eguneko bisitarien kopuruak, “%160, edo bost bisitari gehiago egunero”. Gehienak Errenteria-Oreretakoak direla ere esan du edota Oarsoaldeko gainontzeko herrietakoak, baina turistak ere bertaratzen direla azaldu du.
Hilean behin antolatzen dituzten tailer eta jardueretan ere gora egin du parte hartzeak. Iaz, 120 pertsona aritu dira horietan, babestutako guneak ezagutu, mendi ibilbideetan parte hartu, hondakinak berrerabiliz jostailuak sortzeko, edo herriko parkeetan izaten diren hegaztiak ezagutzeko. Arrakastatsuak halaber, ikastetxeekin egindako bisita gidatuak, hasieran Errenteria-Oreretako eskaerak baino jasotzen ez baziren, hori aldatu egin dela esan dute, eta Oarsoaldeko gainontzeko udalerrietatik bezala, Gipuzkoako beste herrietakoak ere jasotzen omen dituzte. Aurreko ikasturtean 450 ikasletik gora izan ziren errotan.
Talde bisitetan errotara joan zirenak berriz, 190 lagun izan ziren.
Balorazioa, positiboa egin dutena. Horrekin batera, ikasturterako prestatuta dituzten hainbat jardueren berri ere eman dute gaurko agerraldian. Hala gogorarazi dute, Fanderiako errota hileko bigarren asteburuan izango dela zabalik, 10:30etik 14:00etara, eta eskolentzako zein taldeentzako bisita gidatuak antolatuko dituzte ikasturte honetan ere.
Datozen hiru hilabetetako hileko jarduera berezien berri ere eman dute. Maiatzaren 18an Añarbeko Baso Erreserban ibilbide gidatua egingo dute; ekainaren 16an, Natur Potea egingo dute, ingurumenaren gainean pintxo eta pote baten bueltan hitz egiteko. Uztailaren 13an berriz, familiei begira Oiartzun Ibaia gora pista jolasa egingo dute.
Informazio gehiago jaso edo jardueretan izena emateko honako deitu 943 49 45 21 edo 690 72 02 64 telefono zenbakietara edo posta elektronikora mezua bidali.
