Larunbatean, Lezoko Dantzari Txiki Eguna
Goizean desfileak eta emanaldiak egingo dituzte egunean parte hartuko duten hamar taldeek. Arratsaldean, Modestorekin erromeria.
Orotara hamar dantza taldek parte hartuko dute dantzari txikien festan. Murixka Dantza Taldeak Lezoko Dantzari Eguna antolatu du larunbaterako (hilaren 27rako). Osotara, Murixkako dantzari taldeaz gain, beste bederatzi izango dira herrian. Goizean, desfilea eta emanaldiak izango dira herriko hainbat tokitan. Bazkalostean, Modestorekin erromeria izango da Karlos Saldise plazan.
10:30ean bilduko dira larunbatean hamar dantza taldeak Euskal Herria plazan. Hamaiketakoa egin, eta desfilean aterako dira herritik zehar. Hamar taldeak, beste hirutan banatuko dituzte, eta bakoitzak bere bidea hartuko du desfile horretan. Hala, multzo bakoitzak hiru geldialdi egingo ditu, eta horietako bakoitzean multzo horretako partaideen dantza bana eskainiko dute. 13:00etan, Goiko plazan bilduko dira talde guztiak, eta han emanaldi bateratua egiteaz gain, talde bakoitzak dantza bati ekingo dio.
14:00etan joango dira bazkaltzera dantzari gazteak, herriko elkarteetara. Bazkalostean, Modestorekin dantzaldia izango da Karlos Saldise plazan.
Honakoak dira parte hartuko duten hamar taldeak:
- Lezoko Murixka.
- Gure Txoko (Bera).
- Tantirudantza (Lesaka).
- Alur (Ibarra).
- Anitz (Anoeta).
- Gure Txeru (Getaria).
- Haurtzaro (Oiartzun).
- Ereintza (Errenteria-Orereta).
- Lintxua (Donibane).
- Alkartasuna (Antxo).
