Obra bateko makina baten matxurak hautsez bete du Resurrecion Maria Azkue kalea
Langile bat zauritu da, makinatik isuritako hautsa begietan sartu zaionean. Atzo arratsaldean izan zen gertakaria.
Ikusgarria benetan atzo Agustinak auzoan gertatutakoa. Resurreccion Maria Azkue kaleko obra batzuetan lanean ari zirela, silo batean pilatuta zegoen hauts zuria isuri eta kalea eta bertan ziren auto guztiak estali zituen. Udaltzaingoak emandako informazioaren arabera, 17:00ak aldera izan zen gertakaria eta bizilagun baten deiaren bidez jaso zuten gertatutakoaren berri.
Hautsa zein material ote den ez dute zehaztu, baina isurketaren ondorioz, kaleak, inguruko etxebizitzak eta kale horretan aparkatuta zeuden autoak hauts horrek estali eta zikinduta gelditu ziren. Lanean ari zen beharginetako bat, gainera, artatu behar izan zuten hautsa begietan sartu ondoren. Ez dute zehaztu bertan artatu zuten edota ospitalera eraman behar izan zuten, lan istripua izanda Ertzaintzak hartu zuelako esku.
Lana izan zuten garbiketa langileek kalean barrena zabaldutako hautsa garbitzeko. Ondoko bideoak herritar batek helarazitakoak dira.
