"Harro gaude Lezo euskaldun izango dela aldarrikatzeaz"
Euskal Herrian Euskarazen Harrotze Astearekin bat egin dute Lezoko hainbat eragilek. Gogoetarako oharra zabaldu dute.
Lezoko hainbat eragile eta taldek bat egin dute Euskal Herrian Euskaraz (EHE) mugimenduak aste honetarako deitu duen Harrotze Astearekin. “Egun hauetan, Lezon zein Euskal Herri osoan, euskaldun izateaz harro gaudela aldarrikatu nahi dugu, baita harrotasun hori ekintzetara eraman ere”. Horren harira, eragile horiek hainbat jarduera antolatu dituzte herrian, gaur bertan (hilak 25, osteguna) eta hilaren 30ean. “Harro gaude euskaldun izateaz. Harro gaude Lezo euskaldun dela aldarrikatzeaz. Lezon ere euskaldun, eta harro!”, adierazi dute eragileek. Hilaren 22tik 28ra planteatu du EHEk Harrotze Astea. Lezon harago joango dira egitarauarekin.
- Gaurko, Harrotasunaren kalejira-ra deitu dituzte herritarrak. 20:30ean hasiko da, Gurutze Santuaren plazan. Kaleetan euskararen aldarria egin ondoren, mokadutxoa jateko bilduko dira Txerrimuñon 21:15ak inguruan.
- Bigarren ekitaldia hilaren 30erako prestatu dute. Kultura Aretoan, 19:00etan hasita, Zeresan dokumentala emango dute, eta ondoren, Lezoko gazteak eta euskara solasaldiari eutsiko diote Jaime Altuna gizarte antropologo eta Euskararen funanbulistak tesiaren egileak, eta Aitor Salaberria Piztu Lezoko kideak.
EHEk deitutako euskararen harrotze astearekin bat egiteko, agiria izenpetu eta zabaldu dute Piztu Lezok, Txirbilla aisialdi taldeak, Amezti Baso Biziak Jaizkibel taldeak, eta Z! Eraldaketa Kontakizun-ek. Haiek eguneroko barne eta kanpo funtzionamendua euskaraz egiten dutela adierazi dute, eta hori egin dezaten deia luzatu diete herriko gainontzeko talde eta eragileei. “Era berean haurren, gazteen, zein helduen euskara ikasteko esfortzua txalotu nahi dugu, eta Harrotze Astearen barruan ahalegin berezia egin dezaten eskatzen diegu, astebetez euskara hutsean bizitzeko. Ulertzen ez bagaituzte, eta erdaraz egitera behartu, ohar daitezela halako jarrerak oztopo direla Lezoren euskalduntzerako”.
Eragileen hausnarketa konpartitua osorik irakurtzeko, egin klik esteka honetan.
