Orratx!-ek 'UBU Errege' izendatuko du
Maiatzaren 4 eta 5ean estreinatuko du 'UBU Errege' antzezlana Orratx! Antzerki Taldeak. Bi emanaldietarako sarrerak jada salgai daude.
Orratx!-ek 'Ai, ai, ai badatorrela!' lana estreinatu zuen iaz. Ordukoa da ondoko irudia. Orratx! Antzerki Taldeak ez du hutsik egiten. Urtero-urtero, udaberriarekin, lan berria egin eta jendartera zabaltzen du. UBU Errege izena du azken hilabeteetan landu duten obrak. UBU errege izendatuko dute maiatzaren 4 eta 5ean. Izan ere, bi eguneko estreinaldia izango du antzezlanak: datorren asteko larunbat eta igandeko 19:30ean egingo dute lan berriaren emankizuna Lezoko antzerkilariek, Gezala Auditoriumean (sarrerak eskuratzeko klik egin hemen).
Orratx!-ekoek azaldu dute mugarik gabeko komedia dela UBU Errege, txotxongilo sinboliko baldarra bada ere, pertsonaia bat askoz gehiago dela. “Haren hitz jarioak basakeria, ankerkeria eta hizkera absurdo eta zakarra biltzen ditu bere baitan, erakunde eta erregimen guztien parodia batean”, azaldu dute obraren sinopsian antzerkilariek.
Lierni Fresnedok zuzendutakoa da. Aktoreak, honakoak: Araitz Larrea, Amaia Herrero, Joseba Salaberria, Edurne Agirrezabala, Edurne Goikoetxea, Nagore Perez, Jurgi Sarasola, Aratz Ziganda eta Bego Azpiazu. Obra osatzeko beste hainbat konplize izan dituzte argiztapenean (Txema Rivera), soinuan (Txema Rivera eta Amaia Legorburu), espazio eszenikoan (Txema Rivera eta Joxan Intziarte), nahiz itzultzaile lanetan (Nagore Perez).
Obraren berri zehatza izateko, onena maiatzaren 4 eta 5ean Gezalara joatea da. HITZA-k, maiatzaren 3ko astekarian xehetasun gehiago emango ditu.
