Larritasunaren derbia jokatuko dute bihar Touringek eta Pasaiak
Oarsoaldeko taldeak sailkapeneko azken postuetan iritsi dira denboraldiaren une erabakigarrira, eta berebizikoa dute irabaztea jaitsierako postuak atzean utzi eta salbaziora gerturatzeko. Fanderian izango da partida, 16:30ean.
Argazkia: Touring KE. Larritasunaren derbia jokatuko dute bihar Touringek eta Pasaiak Fanderian, 16:30ean. Eskualdeko bi taldeak sailkapeneko azken postuetan iritsi dira denboraldiaren une erabakigarrira, eta biek ala biek berebizikoa dute irabaztea jaitsierako postuak atzean utzi eta salbaziora gerturatzeko.
Gizonen Hirugarren Maila bukatzeko lau jardunaldi falta direnean, Touring sailkapeneko 14. postuan da, 32 punturekin. Pasaia, aldiz, 16. dago, jaitsiera postuetan, 26 punturekin. Hirugarren Maila 18 taldek osatzen dute, eta printzipioz azken hiru taldeek galduko lukete maila. Oarsoaldeko bi taldeen artean Anaitasuna dago. Azkoitiarrek 29 puntu dituzte, Touringek baino hiru gutxiago eta Pasaiak baino hiru gehiago. Haiek Deustoren kontra jokatuko dute etxean.
Touringek zeraman bolada ona eten zuen iragan asteburuan Paduraren kontra galdu ondoren (1-0). Azken 15 puntuetatik 9 zeramatzaten gorritxoek, eta puntu horiek jaitsieratik zertxobait aldentzen lagundu diete. Pasaia, berriz, garaipenaren bidera itzuli zen San Ignacio menderatuta (1-0). Zuri-gorriek hiru porrot jarraian zeramatzaten, baina azken partida irabazi ondoren, indarberrituta iritsiko dira biharko derbira. Joaneko norgehiagokan pasaitarrak nagusitu ziren Jesus Mari Zamoran (2-1).
