Oarsoaldea Behatokiak eskualdeko azken datu sozioekonomikoak aurkeztu ditu
Oarsoaldea Garapen Agentziak kudeatzen du atal hori, eta Oarsoaldeko lan merkatuaren egungo egoera eta egoera sozioekonomikoa aztertzen ditu.
Oarsoaldea Behatokia eskualdeko azken datu sozioekonomikoak biltzen dituen atala da. Oarsoaldea Garapen Agentziak kudeatzen du, eta, besteak beste, Oarsoaldeko lan merkatuaren egungo egoera eta egoera sozioekonomikoa aztertzen ditu. Behatokian lan merkatuari, demografiari, jarduera ekonomikoari, BPGari, BEG eta errentari, ingurumenari eta mugikortasunari buruzko hainbat datu kontsulta daitezke, eskualdeari buruzko “ikuspegi zehatza” azaltzen dutenak.
Langabezia tasari dagokionean, zifrak %6,8an jaitsi dira, azken hamar urteetan 2.245 langabe gutxiago zenbatu baitira Oarsoaldean. Horrez gain, pandemia garaiko langabezia tasa 2024ko martxokoarekin alderatuta, 1,6 puntu jaitsi da eskualdean. Emakumeen langabezia tasa gizonena baino altuagoa dela erakutsi dute zifrek, eta nekazaritza sektorean kontratazio kopurua nabarmen jaitsi dela ikusi da, %73,3ko jaitsiera izan baitute datuek.
Afiliazioen esparruan, afiliatu gehien zerbitzuen eta industriaren sektorean zenbatu dira, %71,4 eta %20,3, hurrenez hurren. Datuen arabera, afiliatu gehienak Lezon (%71,7) eta Oiartzunen (%58,2) bizi dira. Autonomoak, bestalde, enplegatu guztien %19 dira. Errenteria-Oreretan eta Pasaian, aldiz, autonomoen ehunekoa antzekoa dela azaldu dute datuek: %29,8 eta %30,3, hurrenez hurren.
Eskualdeak, gainera, %20,1eko hazkunde-jaitsiera izan zuen azken urtean. Azken datuak 2022koak dira, eta jaiotzen eta heriotzen arteko aldea -377 pertsonakoa izan da. Oarsoaldeko biztanleria atzerritarra, berriz, %11,5ean hazi da.
Establezimenduei erreparatuta, 2008tik 2.043 gune gutxiago zenbatu dira. Datuek beheranzko joera izan badute ere, 36 garapen agentzietatik, Oarsoaldea zortzigarren postuan kokatuta dago establezimendu kopuru handienetik txikienerako eskalan. 2023ko datuen arabera, sektore nagusiak, merkataritza, garraioa, ostalaritza, eraikuntza eta jarduera profesionalekoak dira. Langile kopuruari dagokionez, establezimenduen %72,5ak (3.428 gune) 0 eta 2 langile artean dituzte; eta %14,3 (678 gune) 3 eta 5 langile bitartekoak dira. Hala ere, 2014tik establezimenduetako enpleguen kopurua handituz joan da urtez urte.
Gizarte Segurantzan alta emandako enpresen %81,9a zerbitzuen sektorekoak dira. Familia bereko kide guztien batez besteko errenta pertsonal osoa, aldiz, 42.876 eurokoa da eskualde mailan, 2021eko datuen arabera.
