Zaintza duinaren alde, Jesusen Bihotzan
Herriko adinekoen egoitzetan bizi duten egoerari aurre egiteko, elkarretaratzea egin dute gaur Jesusen Bihotza zentroaren parean.
Jesusen Bihotza zentroaren atarian gaur egin duten elkarretaratzea. Herriko adinekoen egoitzetan zaintza duina berma dadin hasitako dinamikak gaur izan du jarraipena. Jesusen Bihotza egoitzaren atarian elkarretaratzea egin dute bertako langileek, egoiliarren senideek, eta herritarrek. Bertakoa da goiko irudia.
Herrian kezka dago bai Gabierrotarko zentro horretan nahiz Sanmarkosenen langileek dituzten lan baldintzekin, eta ondorioz, egoiliarrek bizi dituzten zailtasunekin. Hala, auzo elkarteek, Oreretako Bilgune Feministak, Oreretako Mugimendu Feministak eta Duintasuna pentsiodunen elkarteak, egoitzetako langileekin eta erabiltzaileen senideekin batera, erabaki dute mobilizazio aroa hastea egoera salatu, eta hobe dadin eskatzeko.
Asteazkenetan, Sanmarkosenen egiten dituzte elkarretaratzeak, eta ostegunetan Jesusen Bihotzan. Gainera, Duintasunak hilabete guztietako lehen astelehenean egiten duen mobilizazioetan ere aintzat hartuko dute egoera: astelehenean, hilaren 6an, pentsio duinak eskatzeaz gain, adinekoen egoitzetako egoera kalera aterako dituzte (11:00etan hasiko da manifestazioa, Herriko Plazatik).
