Mende pasatxoko obra, Orratx!-ek eguneratua
‘Ubu Errege’ antzezlanaren estreinaldi bikoitza egingo du Orratx! Antzerki Taldeak asteburuan. 1896ko obra bat egokitu dute, horren mezua egun ere baliagarri delakoan.
Orratx! Antzerki Taldeak ez du hutsik egiten. Urtero-urtero lan berria egin eta estreinatzen du. Lehen onuradunak beti lezoarrak izaten dira. Aurten ere hala da. Ubu Errege antzezlana Gezala Auditoriumean emango dute Lezoko antzerkizaleek bihar (larunbata) eta etzi, 19:30ean hasita. Sarrerak Lezoko Udalaren Interneteko sarrera salmenta zerbitzuaren bidez eskura daitezke, 8 euroan.
Alfred Jarry dramaturgo frantziarraren Ubu Roi-ren egokitzapena da, ordubete ingurukoa, Orratx!-ekoek ondu dutena. 1896ko abenduaren 10ean estreinatu zuten obra hori Parisko Theatre L’oeuvre antzokian. Arrakastaz. «Iruditu zitzaigun gaur egun gertatzen ari diren gauzekin baduela zerikusia orduko hartan Jarryk egindakoak. Boterea, jendearen gainetik pasatzea boterea eta dirua lortzeko, norberak bere burua salbatzea edozeren gainetik… Gaur egun hori pasatzen ari da. Aspaldikoa da obra, baina egun gertatzen ari diren gauza askorekin harremana du, indarrean dago», zehaztu du Lierni Fresnedo Orratx!-en zuzendariak.
Ubu Errege mugarik gabeko komedia da, erakunde guztien eta erregimen guztien parodia, eta boterearen ur lohitsuetan ugaritzen diren pertsonaien ordezkari leiala da Ubu, «beti aberasteko eta boterean irauteko prest dago, bidean nor zapaltzen duen axola gabe», azaldu dute taldekideek.
Izan ere, Orratx!-ekoak komedian gustura dabiltza. Baina behin antzokitik aterata, zer pentsatua emango duten mezuak izango dituzte burmuinean bueltaka ikusleek. Hori baitute asmo: irribarreen bitartez gizartearen gaineko gogoeta zabaldu, pentsarazi. Fresnedok artearen funtzioetako bat hori dela uste du: dagoena zalantzan jarri, eraldatzeko, entretenimenduaren eta kulturaren bidetik.
Taldekide berriak
Plantilla handitu du Orratx!-ek. Osotara, bihar eta etziko saioetan bederatzi antzerkilarik emango diote forma Ubu Errege-ri. Azken asteetan buru-belarri izan dira antzerkilariak entseguetan; aste honetan, Gezalan aritu dira obrari azken ukituak ematen. Han izan da HITZA haiekin. Honakoak dira: Araitz Larrea, Amaia Herrero, Joseba Salaberria, Edurne Agirrezabala, Edurne Goikoetxea, Nagore Perez, Jurgi Sarasola, Aratz Ziganda eta Bego Azpiazu. Obra osatzeko beste hainbat konplize izan dituzte argiztapenean (Txema Rivera), soinuan (Txema Rivera eta Amaia Legorburu), espazio eszenikoan (Txema Rivera eta Joxan Intziarte), nahiz itzultzaile lanetan (Nagore Perez).
Izan ere, aurreko urteekin alderatuta, gorantz egin du Orratx!-en partaideen kopuruak, aktore gazteekin. Fresnedo: «Zailxeagoa izan da obraren muntaketa hainbeste aktorerekin, denek bere lekua behar dutelako. Baina dena eder joan da. Oso gustura ibili naiz den-dena haiekin batera prestatzen». Taldera iritsi berri diren batzuk eskualdeko beste herri batzuetakoak dira, eta hori, eskualdeko taldeen arteko elkarlanaren ondorioetako bat dela aipatu du zuzendariak.
Gezalako besaulkiak bete egingo dira asteburuko bi emanaldietarako. Lezoarren babesa, beti bezala, hor dute.