Orain, loreontziak aldatzera
Lore eta Landare Azoka Berezia egin dute goizean zehar Gamon Zumardian. Erositakoarekin lan egiten hasteko erabiliko dute askok arratsaldea.
Hamaseigarrenez egin dute goizean zehar, Gamon Zumardian, Lore eta Landare Azoka Berezia. Epel, baina bustitik hasi da landareen zaleen topagunea; goizak aurrera egin ahala hobetzera egin du eguraldiak, beraz, Zumardian herritar eta bisitari askok egin ahal izan dute postuetatik erronda, eta lore, landare nahiz mundu horrekin harremandutako gaien erosteka. Haurrak ere pozik ibili dira, haientzako tailerrak eta jolasak zeudelako, eta nola ez, baliatu dituztelako.
Behemendik, Errenteriako Udalak eta Dekolore elkarteak antolatu dute neguko landare eta loreak kendu, eta udakoak jartzeko balio dezakeen azoka. HITZA bertan izan den bitartean, postuen arduradunek aktibitate dezentekoa zuten, bai saltzen, bai eta azalpenak eta zehaztapenak ematen. Orain, arratsaldean adibidez, erositakoari eta entzundakoari probetxu aterako diote askok, Zumardia izan den loreontzi handitik, etxeko txikira eramango dituztelako eskuratutakoak.
Loreak eta landareak baino gehiago zeuden postuetan: bitxiak, osagaiak, lore eta landareak osasuntsu hazteko produktuak… Giro koloretsu eta polita gaur goizez Zumardian. Ondoko irudiak, horren lekuko.
