"Egungo justizia eta polizia ereduek ez dute funtzionatzen"
Egiturazko aldaketak aldarrikatu dituzte enegarrenez, eta autodefentsa feministarako deia egin gaurko elkarretaratzean.
Gaurko elkarretaratzea Donibane Lohizuneko hilketa matxista salatzeko. Nazka, haserrea eta amorrua izan dira nagusi gaur arratsaldean Oreretako Mugimendu Feministak deitutako elkarretaratzean. Hasteko eta behin, Euskal Herriko Mugimendu Feministaren izenean, babes eta elkartasun osoa adierazi diete eraildako emakumearen senide, lagun eta gertukoei: “Ez zaudete bakarrik”.
Ondotik 34 urteko emakumearen hilketa matxistaren aurrekariei erreparatu diete, kezka biziz, ezinbestean. Izan ere, Donibane Lohizuneko hotel batean hilik topatu aurretik, apirilaren 14an zehazki, Ziburuko hotel bateko bosgarren pisutik erorita larri zauriturik eraman zuten ospitalera, eta bertan izan zen maiatzaren 1era arte. Bikotekidea galdekatu bazuen ere poliziak, aske utzi zuten. Egun gutxira, Euskal Herrian aurten izandako lehen hilketa matxistaren protagonista izan da.
Epaile eta polizia ereduei kargu hartu die mugimendu feministak, argi gelditu da eurentzat batak zein besteak ez dutela funtzionatzen: “Behin eta berriro exijitzen dugu indarkeria matxista kasuen aurrean galbahe bereziki zehatza izan behar dutela epaileek, eta biktimak ezin dituztela babesgabe utzi. Areago biktimaren bizitza argi eta garbi arrisku larrian dagoenean, eta indarkeria matxistaren zantzuak oso agerikoak diren”.
Ahoan bilorik gabe esan dute, “hau bezalako kasuekin argi gelditzen da egungo justizia ereduak ez duela funtzionatzen”. Eredu polizialari ere kritika gogorra gaurko elkarretaratzean, bereziki haserre eta amorratuak bildutakoak: “Aste honetan irakurri dugu, gure herrian, indarkeria matxista salatzera joandako emakumea artatu zuen ertzainak sexu abusuak egin zizkiola emakumeari bere nagusikeriaz baliatuta. Indarkeria alorrean lan egiten zuenak, emakumea artatu eta zaindu behar zuen berberak eraso zuen emakumea. Nazka, haserrea eta amorrua sentitzen dugu, are gehiago Ertzaintzan lanean jarraituko duela pentsatuta”.
Emakume horri ere elkartasun osoa adierazi diote gaurko elkarretaratzera bildutakoek, “eraso matxista bikoitza jasan du, eta mespretxatu ere egin dute”. Eskaera garbia, horren harira ere: “Ertzain horri administrazio publikoan lan egiteko debekua ezartzea exijitzen dugu”.
Egiturazko aldaketak
Hilketa eta eraso bikoitza gutxi ez, eta atzo goizean Irunen emakume bat eraso zutela salatu dute, halaber. Atxilotutako gizonak indarkeria delituengatik aurrekariak zituela jakinarazi dute. Horren aurrean enegarrenez eskatu dute egiturazko aldaketak egiteko, “noiz arte itxaron beharko dugu egiturazko aldaketak gauzatu daitezen?”. Bizitzaren aldeko “apustu erradikala” egin dute eta hori horrela, autodefentsa feministarako deia egin dute, “badakigu antolakuntza eta autodefentsa izango direla gure tresna eraginkorrenak. Feministok erantzuteko prest gaude. Martxan jarraituko dugu, elkarrekin borrokan denak aske izan arte”.
-
- Gaurko elkarretaratzea Donibane Lohizuneko hilketa matxista salatzeko.
-
- Gaurko elkarretaratzea Donibane Lohizuneko hilketa matxista salatzeko.
-
- Gaurko elkarretaratzea Donibane Lohizuneko hilketa matxista salatzeko.
-
- Gaurko elkarretaratzea Donibane Lohizuneko hilketa matxista salatzeko.
-
- Gaurko elkarretaratzea Donibane Lohizuneko hilketa matxista salatzeko.
-
- Gaurko elkarretaratzea Donibane Lohizuneko hilketa matxista salatzeko.
