Gabierrota pasealekua berrurbanizatzeko lanak hasiko dituzte datorren astean
Pasealeku seguruagoa izango dela lanak bukatutakoan azaldu du udalak, baita berdegune eta egonleku gehiago izango dituela.
Datorren astean hasiko ditu udalak Gabierrota pasealekua berrurbanizatzeko lanak. Horiek bukatutakoan seguruagoa izango dela pasealeku hori esan du, baita egonleku eta berdegune gehiago izango dituela ere. Oinezkoentzako gune garrantzitsuenetakoa da ibiltoki hori, 300 metro inguruko luzera eta hektarea erdiko azalerarekin.
Bertan egingo diren lanetarako, Gabierrotako Laguntasuna auzo elkartearekin eta Jesusen Bihotza egoitzako arduradunarekin batera aritu da udala proposamena lantzen azaldu duenez. Esku hartzeak, oro har, pasealeku erakargarri eta seguruagoa egin nahi du, dauden berdeguneak eta egoteko lekuak zabalduta.
Egungo pasealekuaren lur zorua berrituko dute, zoladura berdindu, hondoratutako egungo eremuak kenduta. Bestalde, erdiko espazioa pasealekuaren zati gisa integratuko da, eta horretarako egun dituen jardinerak kenduko dituzte, “loreontzi horiek kenduta %36 handituko dira berdeguneak Jesusen Bihotza egoitzaren ondoko pasealekuaren erdialdea zuhaitzekin indartuz eta gaur egun daudenak errespetatuz”.
Espazioak irabaztearekin batera, ekipamendu berriak jarriko dituzte; zehazki, komun publiko bat eta espazio publiko horretaz gozatzeko hiri altzariak. Ibaiarekiko harremana ere hobetuko dute, irisgarritasuna erraztuz. Horretarako, ur ertzera sartzeko egurrezko arrapala berri bat eraikiko da adinekoen egoitzaren parean, eta arrapala horrek URA agentziak eskatutako ezaugarriak beteko ditu.
Argiztapen sarea ere berrituko dute, azkenik, energia aurrezteko eraginkorragoak diren luminariak instalatuta, “argi horiek dauden zuhaitzetara egokituko dira, segurtasuna eta ikuspena hobetu eta argi kutsadura murrizteko”.
