Errenteria 11 kolore jaialdia, aniztasunari gorazarre egiteko
Hamaika ekitaldi antolatu dituzte jaialdiaren bederatzigarrenean, asteazkenean hasi eta hilaren 29ra arte. Gaur aurkeztu dute udal ordezkariek eta eragileek ondutako egitaraua.
Errenteria 11 Kolore jaialdiaren aurkezpena gaur. Errenteria-Oreretaren izaeraren ezinbesteko osagaia da aniztasuna, eta merezi bezala egingo diote gorazarre Errenterian 11 Kolore jaialdiaren barruan. Bederatzigarrena izango da aurtengoa eta hilaren 15etik 29ra egitarau zabala eta udalerria bezala, askotarikoa, ondu dute udal ordezkariek eta eragileek elkarlanean.
Egitarau horren emaitza eta jaiaren nondik norakoak xehe aletu dituzte Itsaso Cruz Kultur Aniztasuneko, Garapeneko Lankidetzako, eta Giza Eskubideko zinegotziak, Naroa Galdos arlo bereko teknikariak eta jaiarekin bat egin duten hainbat eragilek Agirre Lehendakariaren plazan.
Kultur Aniztasunaren Nazioarteko Eguna izango da hilaren 21, eta horren harira antolatzen dute urtero jaialdia koloretsua. Cruzek jarri dio testuingurua jaialdiari: “Udaletik, gure herriak duen aniztasuna eta aberastasuna ospatu nahi dugu 11 Kolore jaialdiaren bidez. Jakin badakigu kultur aniztasuna gure herriaren ikurretako bat dela eta aniztasun horrek duen aberastasunean jarri nahi dugu azpimarra”.
Helburua, kulturartekotasunak dituen balioak “sustatu” eta “elkarrekin gozatzea” izango dela ere azaldu du zinegotziak. Horretarako askotarikoa den egitarau zabala ondu dutela azaldu du udal ordezkariak, “topaketak, gastronomia, dantza, musika, zinea, haurrentzako jarduerak antolatu ditugu migrazioaz, arrazakeriaz, gorputzez, eta hizkuntzaz gogoeta egiteko besteak beste”.
Galdosek azaldu du egitaraua. Lehen hitzordua, asteazkenean, parean elkartearen Migrantas: Hain gertu eta hain urrun erakusketa. Badalabek ere jarriko du alea egitarau anitz horretan, Kutxaz kanpo #4: Hizkuntzaren jaiotzaz eta heriotzaz rol jokoa antolatu du ostiralean. Dialect jokoaren bitartez, hizkuntza eta mundu baten sorkuntza planteatuko dute hausnarketa kolektiboaren bidez.
Aste honetarako antolatutako azken ekitaldia musika eta ahotsarekin lotua. Igandean, Lekuona Fabrikan, Kontari Landarbasoko abesbatzak eta Musikastek elkarlanean antolatutako Kolore Kontari musikal parte hartzailea taularatuko dute, eta abesbatza horretako abeslariekin batera udalerriko ikastetxeetako ikasleak ariko dira agertokia kolorez jantzita aniztasuna aldarrikatu eta duen balioa nabarmentzeko.
Horiek hiru baino ez dira, datorren astean eta hilaren 29ra arte, instalazio artistikoak, zinema emanaldia, Burubeltz konpartsaren kalejira koloretsua, munduko zaporeak dastatzeko aukera herriko 24 taberna eta jatetxetan, eta Latinoamerikako dantza tailerren eta musikaren jaialdia egingo dute egun osoz hilaren 25ean. (Egitarau osoa hemen klik eginda kontsulta daiteke).
Bukatzeko, esker on mezua udalak jaia posible egin duten eragile gutziei: “Herriko sei iakstetxeei batetik, baita herriko ludotekei, Errenkoalde elkarteari eta herriko dendei, Ostari eta herriko taberna eta jatetxeei, Landarbaso Abesbatza, Musikaste, Ozzinema, Elkarrekin Koop, Txintxarri, Mikelazulo, Burubeltz konpartsa, Nirawa batukada, Swindg dantza eskola, Fikzio fabrika, Badalab, Dejabu, Euskozenoa eta Sos arrazakeriari”.
