Palestinaren alde egin du Ikamak
Ikasleak ere kezkaz ari dira Palestinari so. Gaur kalera atera dira genozidioa eteteko eskatzeko Ikamak deituta.
Ikamaren manifestazioa gaur eguerdian Errenteria-Oreretan. Argazkia: Garazi Agirresarobe Lehen lerroan jarri dira gaur ikasleak Palestinari sostengua adierazteko. Ikamak deituta, greba egin dute ikasleek Israelgo Estatu “sionistak” Palestinaren kontra inoiz egindako sarraskirik handiena abiatu zuenetik zazpi hilabete bete direnean. Gogor salatu dute genozidioa eta gogora ekarri datuekin egoeraren laztasuna: “dagoeneko 35.000tik gora dira Gazan hil dituzten palestinarrak, 78.000 zaurituak eta 7.000tik gora desagertutakoak”.
Herriko Plazatik abiatu dute manifestazioa eta erdialdeko kaleak zeharkatuta abiapuntuan bukatu dute protesta. Aipamen berezia, azken hilabetean mundu osoko unibertsitateetan antolatu diren kanpaldiei, “milaka ikaslek unibertsitateak hartu eta palestinarren kontrako genozidioaren zein Israelgo Estatuarekiko Nazioarteko hainbat gobernu eta instituzioen kolaborazioaren aurrean planto egin dute”. Historiako hainbat prozesutan ikasleriak izan duen eraldaketarako motore izaera aitortu dute, “horrela izan da historikoki, eta oraingoan ere horrela izatea ezinbestekoa da. Euskal herrian ikasleria ez da besoak gurutzaturik geratu orain arte, ezta orain ere geratuko”.
Israelen bortizkeria bukatzetik urrun, Rafahren gaineko erasoa abiatu duela gogor salatu dute bildutakoek, “genozidioari segida emanez”. Horren harira, eskaera zehatza akademiako instituzioei eta hezkuntza sailei gaurko protestan ere: “Israelgo unibertsitateekin, ikerketa zentroekin, enpresekin, eta bestelako erakunde batzuekin harreman instituzionalak eta akademikoak behin betiko etetea eskatzen dugu”.
Herritarrei deia, bestalde, mobilizatzera, “inoiz baino garrantzitsuagoa da kalera ateratzea genozidioaren kontra eta nazioarteko komunitateak Israelen aurrean planto egitea, Palestinaren askatasuna lortu arte geroz eta indar gehiago biltzea”.
Elkartasunari erreferentzia gaurko mobilizazioan Ikama gazte antolakundeak, “injustiziei aurre egiteko elkartasuna da herriok dugun arma nagusiena. Bakoitzak dagokigun lekutik tira egin eta Israel Palestinarekin egiten ari den genozidioa bukatzea dagokigu. Horregatik argi diogu aski dela, genozidioa bukatu behar dela eta Palestinako herriarekin izango garela”.
Orereta Palestinarekin Herri dinamikak mobilizatzera deitu du
Komunikatua zabaldu du Orereta Palestinarekin Herri dinamikak gaur goizean sare sozialen bidez, baita komunikabideetara helarazi ere. Duela zazpi hilabete abiatutako sarraskiarekin jarraitzen duela Israel salatu du dinamikak, eta pasa den urritik, 35.000tik gora palestinar hil dituela, horietako asko eta asko, haurrak. Dozenaka mobilizazio, ekintza eta hitzaldi antolatu direla Euskal Herri luze zabalean, baita Oreretan ere jarri dute nabarmen, eta azken asteetan inoizko mobilizazio jendetsuenak antolatu direla munduan, “argi utzi dute herrialde ezberdinetako herritarrek zapalduen aldeko elkartasuna”.
Bide horretan konpromisoa azaldu du dinamikak Palestinaren alde mobilizatzen jarraitzeko, “Palestinako herriari eta bere erresistentziari elkartasuna adierazteko”, eta dei egin die herritarrei Palestinaren alde antolatutakoetan parte hartzeko. Gaur Ikama ikasle antolakundeak deitua zuen mobilizazio egunarekin bat egin du dinamikak eta beste lau deialdi zabaldu ditu. Bihar bertan, dinamikak berak eta BDZ Boikota, Desinbertsioa eta Zigorrak taldeak antolatuta Hijas de la Nakba filma emango dute Xenpelar Kultur Etxean 19:30ean. Ondoren solasaldia egingo dute.
Asteazkenean, berriz, Nakba egunarekin bat eginez BDZk Donostian antolatutako manifestazioarekin bat egitera deitu dituzte herritarrak. 19:00etan abiatuko da Bulebarretik. Ostiralean berriz, hilak 17, sindikatuek deituta lanuzte eta kontzentrazioak egingo dituzte, eta hurrengo egunean, larunbatean, 12:00etan nazio manifestazio izango da Iruñean.
Argazkiak Garazi Agirresarobek eginak dira.
