Sustapen kanpaina berri bat abiatu dute kirol instalazioetan
Udari begira herritarrak aktibatzeko helburuarekin, Galtzarabordako eta Fanderiako kirol instalazioetan hilaren 31 baino lehen alta ematen duten pertsonek, matrikularen kostuan %100eko deskontua izango dute.
Galtzarabordako eta Fanderiako udal kirol instalazioetan sustapen kanpaina berri bat abiatu dute, aurtengo udari begira herritarrak aktibatzeko helburua duena. Hilaren 31 baino lehen kirol instalazioetan alta ematen duten pertsonek, matrikularen kostuan %100eko deskontua izango dute abonu mota guztietan; orokorrean zein igerilekukoan.
Kanpaina horren baitan, izena emateko momentuan, maiatza eta ekaineko hilabeteak ordainduko dira, eta irailaren 30a arte jarraitzeko konpromisoa sinatu beharko da. Halaber, kirol instalazioetan sartzeko gailuaren kostua ordaindu beharko dela jakinarazi dute.
Alta berriak bi modutara egin daitezke: aurrez aurre Galtzarabordako zein Fanderiako harreretan edo webgunearen bidez. Informazio gehiagorako edo sustapen kanpainaren gaineko baldintzak ezagutzeko, interesdunak Galtzarabordako (943 44 96 90) eta Fanderiako (943 34 44 23) harrerekin harremanetan jar daitezke.
