Jostakeitanekin, pozik bizitzeko lau egun
Iritsi da berriz ere familietan euskararen erabilera sendotzeko Jostakeitan egitasmoa. Saioak hilaren 15 eta 22an, nahiz ekainaren 5 eta 12an egingo dituzte.
Iazko saio baten irudia da honakoa. Pozik eta euskaraz bizitzeko lau egun, lau arratsalde behintzat bai, izango dira Lezon maiatza eta ekaina bitartean. Familia Lagunak egitasmoaren barruan Jostakeitan saioak antolatu dituzte berriz ere herriko hainbat eragilek maiatzaren 15 (bihar) eta 22rako, nahiz ekainaren 5 eta 12rako. Familiak (gurasoak eta haurrak) berriz ere Goiko Plazan elkartuko dira, jolasen bitartez komunitatean harremanak sendotzeko, herriko ikuspegi zabal eta familiei beraiei begirakoarekin. Jakina, euskaraz. Lezon euskaraz familia giroan natural aritzeko gunea baita Jostakeitan.
Adin tarteka egingo dituzte lau arratsalde horietako saioak. Hala, 3-5 urteen artean dauden umeak eta haien familiak Zotz taldeko partaide izango dira, eta 17:00etan elkartuko dira Goiko Plazan. Potz taldea, berriz, 6-9 adin tarteko gaztetxoena eta haien senideena da, eta ordubete geroago egingo dute bere plaza, 18:00etan alegia.
Egitasmoaren bultzatzaile Lezo Herri Eskola, eta horren barruko Euskara Talaia nahiz Hezikuntza Guraso Elkartea dira. Txirbilla Aisialdi Taldekoek antolatuko dituzte jolasak. Lezoko Udalaren babesa du Jostakeitanek.
