Bikaintasuna Don Boscori
Don Bosco LHII bikaitnasun sareko kide izango da beste 49 ikastegirekin batera. Kimika arloari aitortu diote bikaintasun hori.
Espainiako Estatuko bikaintasun zentroen bisita. Argazkia: Don Bosco LHII Bikaintasuna aitortua duten 50 ikastegiren sareko partaide izango da Don Bosco LHII. hala erabaki du Hezkuntza, Lanbide Heziketa eta Kiroletako Espainiako ministerioak, bikaintasun sare hori osatzeko egin duen bigarren deialdian. Europako Batasunak laguntzen du diruz sare horren eraketa. Zehazki, Don Bosco LHIIko Kimika arloa da hautatu dutena.
Hautaketaren harira, milioi bat euroko diru laguntza jasoko du lanbide heziketa zentroaren Kimika arloak, kimikaren arlo horretan ari diren beste autonomia erkidegotako sei ikastetxerekin batera berrikuntza proiektuak diseinatu eta garatzeko. Don Boscoko arduradunek azaldu dutenez, “ekosistema hori osatuko duten lanbide heziketa zentroek berrikuntza, iraunkortasun, digitalizazio, eta ekintzailetasun sustatzaile gisa ariko dira. Arlo horiek, Lanbide Heziketa eredu berriaren oinarrizko ardatz transbertsalak dira”.
Don Boscok, horietan esperientzia duela nabarmendu dute gainera zentroaren arduradunek, “izan ere Araba, Bizkai eta Gipuzkoako Lanbide Heziketako zutabeak izan dira, eta Lanbide Heziketaren Euskal Plangintzan jasota daude”.
Kimika arloko irakasleak. Argazkia: Don Bosco
Bikaintasun aitortzak Kimika arloko “erreferente” bihurtu duela Errenteria-Oreretako Lanbide Heziketako zentroa ere esan dute Don Boscoko arduradunek, eta hori gainera, bereziki “ilusionagarria” den unean heldu dela diote: “2024-25 ikasturtetik Errenterian emango ditugu lau ziklo formatiboak: Goi Mailako analisi laborategia eta kalitate kontrola, Produktu farmazeutikoak, bioteknologikoak eta antzekoak fabrikatzea, Industria kimika, eta Erdi Mailako Kimikagintza”.
Espezializazio bi programa ere eskaintzen ditu Don Bosco LHIIk: Fabrikazio Industriala eta terapia genetikoko sendagaien kalitate kontrola, eta Produktu bioteknologiko eta medikuntza gailuak. Horretaz gain, lanerako formazioa, eta profesionaltasun agirien akreditazioa ere egiten dute.
Inguruko kimika, bioteknologia, farmazia, elikagai berezi, paper fabrika, kosmetika eta metalurgia enpresekin eta ikerketa zentroekin harreman estua du, gainera, Don Bosco LHIIk, ikasleen praktikak bideratu, hezkuntza dualerako, eta lan poltsaren kudeaketarako.
Orain heldu zaion aitortza “oso garrantzitsua” dela nabarmenduta, kimika sailaren sendotasuna agerian jartzen duela diote arduradunek, “azken urteetan Kimika arloa osatzen duten 40 irakasleek aberastasunaren eta lanaren sorrerarako estrategikoa den sektore honetan egin duten lan handiaren emaitza da”.
