Erresidentziez hausnartzeko batzar irekia
Ostegunean deitu dute batzar irekira egingo dituzten hurrengo urratsak adosteko eta egungo informazioa emateko.
Elkarretaratzea gaur zumardian. argazkia: @duintasuna Estu eta larri egunerokoan. Langile faltan, egoki eta duin aritzeko ezintasunez beharginak; langile faltan eta ratio exkaxen menpe, zaintza publiko duin baterako eskubiderik gabe egoiliarrak. Horrela segitzen dute Sanmarkosene eta Jesusen Bihotza adinekoen erresidentziak gaur gaurkoz. Hori horrela, zaintza publiko duinerako aldarria, kalean.
Duintasuna pentsiodunen elkarteak antolatuta kalera eraman dute egoitzetako afera eta zaintza publiko duinerako eskubidea galdegin enegarrenez. Hilabete honetan astelehenero ari dira elkarretaratzen Zumardiko azoka txikian eta Niessen merkatalguneko sarreran arazoa gizarteratu eta sentsibilizazio landu asmoz, aterabide egoki baten mesederako.
Asteazkenean Sanmarkosenen egingo dute elkarretaratzea langile eta erabiltzaileen senideek, 11:00etan; eta ostegunean, berriz, Jesusen Bihotza egoitzako langile eta erabiltzaileen senideak aterako dira berriro kalera.
Batzar irekia
Gaia lantzeko lehen hartu emana egin dute Gipuzkoako Foru Aldundiak eta erresidentzien alde borrokatzeko eratu den herri sareak —auzo elkarteek, Oreretako Mugimendu Feministak, Oreretako Bilgune Feministak, langileak, erabiltzaileen senideak, eta Duintasuna pentsiodunen elkartea—. Horren berri emateko, zein une honetako bi erresidentzien egoeraren berri azaldu eta datozen mobilizazioak adosteko batzar irekia antolatu dute. Ostegunean izango da, etzidamu, Reina aretoan, 18:30ean hasita. Herritar guztiak deitu dituzte parte hartzera.
