Gipuzkoa Bertsotan-en bigarren faseko saioa, Pasaian
Larunbarean izango da, Donibanen. Bigarren faserako Oarso Bidasoko bi bertsolari sailkatu dira: Emaitz Murua oreretarra, eta Manu Goiogana irundarra.
Lehen fasea eginda, asteburuan hasiko da Gipuzkoa Bertsotan lehiaketaren bigarren fasea. Larunbatean (hilaren 25ean), fase horri ekiteko bi saio izanen dira, horietako bat Pasaian: Donibaneko Juanba Berasategi aretoan egingo dute, 17:00etan hasita. Andoni Mujika Izagirre (Urnieta), Ane Zuazubizkar Iñarra (Arrasate), Antton Fernandez Lasa (Urretxu), German Urteaga Garmendia (Beasain), Gorka Maiz Alustiza (Gabiria) eta Unai Izagirre Etxeberria (Azkoitia) izango dira bertsolariak. Iban Narbaiza Cevidanesek emango dizkie gaiak. Bertarako sarrerak hemen klik eginda eros daitezke: gazteen tiketaren prezioa (6-18 urte) 5 eurokoa da, sarrera arruntarena 7 eurokoa.
Gipuzkoa Bertsotan, udazkenean egitekoa da Gipuzkoako Bertsolari Txapelketarako sailkapen fase antzerakoa da. 74 bertsolarik hasi zuten bidea lehen fasean, eta bigarrenera 48k egin dute jauzi, betiere lortutako puntuazioaren arabera. Bigarren honetan Oarso Bidasoko bi bertsolari arituko dira: Emaitz Murua Arzallus oreretarra (bigarren faseko saioa 25ean bertan du, Antzuolan), eta Manu Goiogana Bengoetxea irundarra (bigarren faseko saioa ekainaren 1ean du, Elgetan).
Bigarren fase horretako 34 lehenek izango dute eskubidea udazkenean egingo den Gipuzkoako Bertsolari Txapelketan parte hartzeko. Bertan zain izango dituzte herrialdeko azken txapelketan (2019an izan zen) finalerdietara iritsi ziren bertsolariak. Bigarren fase horretan osotara zortzi saio egingo dituzte, bakoitzean sei bertsolari izango direlarik.
