Azken ostiralera deitu dute sindikatuek
Sare eta Etxeratekin batera, ELA, LAB, ESK, eta Steilas sindikatuek deitu dute biharko euskal preso eta iheslarien eskubideen aldeko elkarretaratzera.
Euskal preso, errefuxiatu eta iheslariak etxeratzeko eskatzeko bandera Oreretako etxebizitza bateko balkoian. Euskal errepresaliatuen aldeko aldarriak kalean jarraitzen du. Horren erakusle da Azken Ostirala dinamika. Horren barruan, hileko azken ostiralarekin kalera ateratzen dira euskal preso, errefuxiatu eta iheslarien eskubideak errespeta daitezen eskatzera. Orain arte bezala, eragile ugari ari dira batzen dinamikara, eta biharko elkarretaratzearen deialdia Sare Herritarra eta Etxerat euskal preso, errefuxiatu eta iheslarien senide eta lagunen elkartearekin batera, sindikatuek egin dute.
Zehazki, ELA, LAB, ESK, eta Steilas sindikatuak dira deitzaileak, eta argi adierazi dute, gainera, lanean jarraituko dutela “preso, errefuxiatu eta iheslarien eskubideak errespeta daitezen, salbuespen legedia bertan behera utzi eta lege arrunta aplika diezaieten lortzeko”.
Sindikatuek, herritar guztiak deitu dituzte eskaera horiekin bat egin eta azken ostiralera batu daitezen. Zita bihar ostirala, 19:30ean Herriko Plazan.
