Gauerdian hasiko dituzte Iztieta eta Altzate lotuko dituen zubiaren lanak
Gauerdian hasi eta astelehen gauerdira arte luzatuko dira lanak, eta eragina izango dute bizilagunengan.
Oiartzun ibaiaren bi aldeetan jarri dituzte garabi handiak zubia muntatzeko. Ikusmina piztu dute Iztieta eta Altzate lotuko dituen zubi berriaren lanek. Altzate inguruan zubi berriaren egitura muntatuta, gaur bertan hasiko dira hori bere lekuan jartzeko lanak. Gauerdian izango da hori, eta astelehen gauerdira arte beharko dute bukatzeko. Lan horiek oinezkoei eta ibilgailuei eragingo diete.
Zubia muntatzeko 650 tonako garabi autopropultsatu bat jarri dute. Zubiaren tamaina eta pisuagatik, garabiak kontrapisu guztiak beharko ditu maniobra egiteko eta kontrapisuak kamioiekin lekualdatu eta muntatuko dituzte. Lehenik, lan eremuan kokatu behar dute garabia, katuak banaketa xaflen gainean zabaldu, eta ondoren, kontrapisuak eta superlifta muntatu.
Lan horiek egiteko Iztieta pasealekuko oinezkoen pasabidea moztuko dute Galiziako biribilgunetik, garabia jarriko den punturaino. Atari eta lokaletarako sarbidea libre geldituko da. Garabia kokatzeko, halaber, Irun eta Astigarraga kaleen arteko Iztieta pasealekuko aparkaleku plazak erabiliko dituzte, eta tarte horretan diren edukiontziak mugituko dituzte.
Gaur 00:01ean hasiko dira lanak, eta asteleheneko 23:59an bukatuko dituzte.
-
- Garabia Altzaten
-
- Garabia Iztietan
