Ia urtebetez itxita izan ondoren, bihar zabalduko dute Aiton Bordako taberna
Biharko (hilak 31, ostirala) 19:00etan irekiko dute berriz ere taberna. Asteartetik aurrera menuak eta pintxoak ematen hasiko dira.
2023ko ekainean utzi zioten Aiton Bordako taberna ustiatzeari aurreko kudeatzaileek. Ia urtebeteren ondoren, bihar zabalduko dute berriz ere taberna hori, Lezoko Udalak jakinarazi duenez. Mikel Arruti alkatea pozik mintzo da, udal gobernuaren zereginen artean zerbitzu hori berrabiatzea zegoelako: “Herriko pertsona helduen bilgune garrantzitsua da, eta ahalik eta azkarren Aiton Bordako tabernaren ateak berriro zabaltzeko lanean ibili gara”.
Biharko (hilak 31, ostirala) inaugurazio ekitaldia prestatu dute. Hara gerturatzen diren guztiek izango dute zer jan eta edan 19:00etan hasita. Asteartetik aurrera, berriz, ohiko taberna zerbitzuaz gain, menuak, pintxoak eta errazioak salduko dituzte.
Udalak bi urterako esleipena egin die taberna ustiatuko dutenei. Bi aldeek hala erabakitzen badute, beste bi urtez luzatuko litzateke kontratua. Esleipen prozesua otsailaren 29an hasi zen.
