Lezoko udaleko hautetsi eta langileak berdintasun formazioa jasotzen ari dira
Orotara, politikari eta udal langile artean, 35 kide parte hartzen ari dira prozesuan. Zortzi saio mailakatu egingo dituzte.
Lezoko Udaleko hautetsi zein langileak berdintasun irizpideen gaineko formazioa jasotzen ari dira. Maiatzaren 13an egin zuten lehen saioa udalbatzako kideekin, eta hurrengoa ekainaren 18an izango da, hainbat arlotako langileekin. Orotara zortzi saio jasoko dituzte udal hautetsi eta langileek. Osotara udaleko 35 kide parte hartzen ari dira formazioetan, 21 gizon eta hamalau emakume.
Lezoko Udalak zehaztu du III. Berdintasun Planetik eratorri den formazioa da egiten ari direna. Bertako 18, dekretuaren arabera, erakunde publikoek berdintasunaren gaineko eta genero ikuspegia zeharka txertatzeko derrigorrezko oinarrizko prestakuntza mailakatu eta iraunkorra eskaini behar diete beren langile eta politikariei. Hala, Idoia Lekue aditua gidatzen ari den saioetan, besteak beste, berdintasun plangintzen, gobernantza feministarako neurrien, eta berdintasun politiken zeharkakotasunaren gaineko gogoeta egiten ari dira.
