Energia berriztagarrien komunitatea, hurbilago
Iratzerri Lezo Ingurumen Elkarteak eta Lezoko Udalak elkarlanean, energia berriztagarrien komunitatea sortzeko baliagarri izango diren jardunaldiak antolatu dituzte datozen egunetarako.
Iratzerrikoak, informazio tailerra eskaintzen Oroitzene AEKn. Irmo jarraitzen du Iratzerri Lezo Ingurumen Elkarteak herrian energia berriztagarrien komunitatea sortzeko bidean. Barne formazioa badute bertako kideek, baita inguruko herrietako ereduen —Oiartzungoa eta Errenteria-Oreretakoa kasu— berri zehatz ere. Lezora zabaldu nahi dute egitasmoa, ordea. Bide horretan, Lezoko Udalaren laguntzarekin, Energia-Klima Jardunaldiak antolatu dituzte datozen egunetarako. Lehen ekitaldia atzo bertan egin zuten Gezala Auditoriumean: Izadi 21eko kideen eskutik, Lezoko Udalaren Energia Planaren diagnosiaren berri izan zuten herriko antzokian izan zirenek; horri ekarpenak egiteko aukera izan zuten bertaratuek. Jardunaldien barruan beste bi jarduera daude, goiko koadroan zehaztuta dago zer eta non diren.
«Jardunaldiak energia komunitatea herrian eratzen hasteko lehen urratsa izango dira», zehaztu du Iratzerriko kide Ekaitz Bravok. Nabarmendu du Lezoko Udalak Goienerren aholkularitza zerbitzua kontratatu duela eratze aro horretan bidelagun izateko, eta prozesuaren gakoa informazioa zabaltzea izango dela nabarmendu du, «jendeak uler dezan prozesu hau nola garatuko den».
Iratzerrik eta Goienerrek dinamizatuko dute komunitatea eratzeko egitasmoa, eta asmo dute urritik aurrera martxan jartzea komunitatea ardazteko batzarren aroa, horri atxikitzen direnei formazioa eman, eta proiektua hedatzea lehentasun izango dutelarik. «Orain, uda baino lehen, giroa berotu nahi dugu. Aldi berean kontaktuak lortu nahi ditugu, komunitatearen gaineko interesa duten herritarrenak», adierazi du Bravok.
Gaia, jendartera
Energia Plana garatzeko plana aurrera darama udalak, eta atzo bertan aurkeztu zuen horren barruko diagnosia. Hala, plan horren aurkezpena baliatu nahi izan du Iratzerrik energia berriztagarrien eta iraunkortasunaren gaia berriz ere jendartearen egunerokotasunera ekartzeko, eta orain arte bildu duten informazio eta jakinduria guztia zabaltzeko. Horrez gain, paraleloan, Oroitzene AEK euskaltegian tailerrak garatzen ari dira, ikasleen artean argindarraren faktura ulertzeko trazak azaldu, eta nola aurreztu jakinarazteko.
«Energia komunitateari forma emateko ezinbestekoa da talde sendo bat eratzea. Hortik iritsiko da egitasmoa herrian ezartzeko aukera. Beraz, guretzat jardunaldi hauek inportanteak dira bide horretan», jakinarazi du Iratzerriko kideak.
EKAINAK 4, ASTEARTEA
- Hitzaldia. 18:30ean, Gezala Auditoriumean, Goienerreko kideek energia berriztagarrien komunitatea sortzeko aholkularitza zerbitzuaren berri emango dute.
EKAINAK 6, OSTEGUNA
- Tailerra. 18:30ean, Kultura Aretoan, argindarraren faktura ulertzeko eta argindarra aurrezteko tailerra, Iratzerrik emana.
