Ttipi-ttapak 'bueltaxka lasaiak' egingo ditu ostegunetan
Abittu orientazio zerbitzuak herritarrek batera ibilaldiak egiteko hitzordu berria eskainiko du. Ostiraleko hitzorduak mantenduko dira.
Udalaren Abittu orientabide zerbitzuak kirola egiten ez duten herritarrekin egiten du lan. Haren xedea, herritarrak kirol eremuan aktibo bihurtzea da, eta haien bizi kalitatea hobetzeko, Ttipi-ttapa egitasmoa abiatu zuen 2018an. Ordutik, ostiralero elkartzen dira 20 pertsona inguru, herriaren inguruko bide eta mendietatik ibilaldiak egiteko pare bat orduz.
Egitasmoak arrakasta izan duela ikusita (40 pertsona desberdinek parte hartzen dute), Abittu harremanetan jarri da Zaintzadi eta Petra Lekuona egoitzarekin. Hori horrela, aurrerantzean, astero elkartuko dira ostegunetan ere, “bueltaxka lasaiak” egiteko. Profil eta behar desberdinak dituzten herritarrengana heldu nahi dute, kirola inklusioarekin uztartuz. Beraz, datorren ekainaren 6an hasita, 10:30ean elkartuko dira Doneztebe Plazan, are eta ibilaldi laburragoak egiteko.
Antolatzaileen arabera, ibiltzeko autonomia duen edonork parte hartu dezake ibilaldiotan, bitartean solasteko aukera soberan egongo delarik. Parte hartzeko ez da izenik eman beharko, norbera hitzordura hurbiltzearekin nahikoa izango da. Bestalde, gogorarazi dute ostiraletako ibilaldiak luzeagoak direla, eta hitzordua 09:30ean dutela finkatuta, kiroldegian.
