"Eraldaketa gaitasuna biderkatzera" datoz Euskal Herriko Gazte Feministak
Euskal Herriko Neska Gazteak-ek subjektua eta izena aldatu du, gaurtik EHko Gazte Feminista gisa ariko da. izena eta izana aldatzera doazela diote, "helduleku berri batetik" ekingo diotela orain.
Euskal Herriko Neska Gazteak mugimenduak subjektua eta izena aldatu du, gaurtik Euskal Herriko Gazte Feministak izena hartuko du. Errenteria-Oreretako herriko plazan agerraldia egin dute taldeko zenbait lagunek gaur goizean, azken hiletan emandako prozesuari itxiera eman eta gaurtik taldeak hartuko duen norabidea azaltzeko.
“Mugimendu baten subjektua ez da egun batetik bestera aldatzen; prozesu luzeak, akatsak eta zuzen egindakoak behar dituelako. Mugimendu Feministaren parte direnek ondo dakite hori, ugariak bezain beharrezkoak izan baitituzte subjektu politikoaren inguruko eztabaidak, bere zabalpenak eta problematizazioak”, esan dute lehenik.
Euskal Herriko Neska Gazteen sarea ez dela honen salbuespena izan erantsi dute. Gogorarazi dute Elizondoko Baterajotzean egonezin eta gatazkak mahai gaineratu zituztela taldekoek, eta Usurbilgo Baterajotzeko mahai inguru zentralera eraman zituzten horiek, eta bertan berretsi zuten “subjektu politikoa aldatzearen erabakia”. Urriaren 14tik gaurdaino eztabaida politiko horiek “praktika eta estrategia militanteetan zein forma hartzen duten hausnartzen” aritu dira.
Euskal Herriko Neska Gazteak “gazte askorentzat” militantzia eta feminismo eskola bat izan dela gaineratu dute gaur: “diskurtso feministak beraienak egiten hasteko, herriak feminismotik eraldatu eta herrian feminismotik bizitzeko, boteretzeko eta politika egiteko lekua izan da. Esperimentatzeko, desnormalizatzeko, gizonen botereari uko egiteko eta aliantza feminista sendoak eraikitzeko espazio izan da”.
Urte luzeko lanaren ondoren osatu duten sareak “eraldaketa gaitasun ikaragarria” duela ere esan dute, eta orain “eraldaketa gaitasuna biderkatzeko” asmoz, izena aldatzera doazela jakinarazi dute.
Aldaketa hau “neska identitatearen eta heterosexualitatearen problematizaziotik” abiatzen dela azaldu dute. Aipatu dute bizirauteko gizartearen beste erdiarentzat doanik lan egiteak egiten duela bat emakume, eta lan hori “erregimen heterosexualean egikaritzen” dela: “Horregatik, emakume izatea ez dela ezer biologikoa, ezer berezkoa ezta desiragarria ere”.
Sareko kide askok neska gisa sozializatzen direla diote, eta badirela ere “patriarkatuak sortu dituen emakume-gizon kategoria dikotomikoak gainditzen dutenak, zis heterosexualitatearen disidentziatik”. Sozializazioak sozializazio, denak emakume klasearen alde ari direla nabarmendu nahi izan dute, “bere desagerpenera iritsi arte”.
“Beraz, sareko kideak elkartzen gaituena ez da ‘neska’ izatea. ‘Norbera sentitzen den horrek’ baino, patriarkatuagatik zapalduak izateak eta bere aurka egiteak elkartzen gaitu. Proiektu politiko batek elkartzen gaitu. Sistema iraultzeko eta berri bat eraikitzeko nahiak eta konpromisoak ditugu. Finean, feminista izateak elkartzen gaitu”, esan dute, ozen.
Helduleku berri batetik
Hortaz, izena eta izana aldatzera doazela diote, “helduleku berri batetik” ekingo diotela orain taldekoek. Beraien burua izendatzeko era aldatzea “ezinbestekotzat” jo dute “diren hori eraldatzen hasteko”. Zentzu horretan iruditegi, kolore eta formak aldatuko dituzte: “deformatuko dira, hautsi eta berriz elkartzeko”.
Subjektu politikoaren aldaketa horrek “patriarkatuaren ulertzeko markoa berrezartzeko abagunea irekitzen” diela erantsi dute, “emakume identitatearen problematizazioak, diskurtsoak berritu eta erradikalizatzekoa”.
Hortaz, gaurtik Euskal Herriko Mugimendu Feminista gisa ariko dira, “arnas berritu eta astintzekoa, erronka berriei toki eraberrituetatik eustekoa, borrokak hauspotzekoa eta gaitasun eraldatzaileak biderkatzekoa. Euskal Herriko Mugimendu Feministaren historia letra propioz idazten jarraitzeko. Finean, beti egin duten gisan, feminismotik sistema osoa iraultzeko”.
