Dantzaz-ek eta Oarsoaldeak lankidetza-hitzarmena sinatu dute
Sinatzaileek adierazi dute urrats esanguratsua dela dantzaren sektorea profesionalizatzeko eta kultura eta sormen ekosistema indartzeko.
Dantzaz-ek eta Oarsoaldeak lankidetza-hitzarmena sinatu dute dantzaren sektorea eta kultura eta sormen industriak bultzatzeko helburuarekin.
Dantzaz, dantzaren sektorea garatzeko zentroa da, “arlo horretan enplegua eta profesionalizazioa sustatzera bideratuta dagoena, eta elkarte horrek sorkuntza eta ikerketa sustatzen ditu bertako zein nazioarteko interpreteei eta koreografoei aukerak eskainiz”.
Bestalde, Oarsoaldea garapen agentziak eskualdearen garapen sozioekonomikoa “bultzatzeko” lanean jarraitzen du, enpresa berriak sortzen, enplegua sortzen eta enpresen berrikuntza eta lehiakortasuna sustatzen lagunduz. Ildo horretatik, Oarsoaldea, eskualdeko udalekin batera Agustinak Zentroa bultzatzen ari da, kultur eta sormen industrietako proiektuak sortu, saretu eta hezteko asmoz. Gauzak horrela, ekosistema kulturala eta sortzailea bultzatuko du, sektoreko eragileekin lankidetzan arituz.
2024 eta 2025ean Kabidanz proiektuan bideratutako hainbat jarduera egingo dira Agustinak Zentroan, eta Dantzagunearen lokaletan egiten den eguneroko jarduerekin uztartuko dituzte. Besteak beste, arte eszenikoetako ekintzailetzari buruzko tailer espezifikoak eta prestakuntza “aurreratua”, arte eszenikoen hibridazio proiektuak diseinatzea eta asmatzea, eta sareko jarduerak tokiko eta Europako beste zentro batzuekin Dantzaz EDNko (European Dance Development Network) kide dela aprobetxatuz. Horretaz gain, arte eszenikoetan ekiteko interesa duten pertsonentzako “aholkularitza espezializatua” eskainiko dute.
Sinatzaileek adierazi dute Dantzaz eta Oarsoaldearen arteko lankidetza-hitzarmena urrats esanguratsua dela dantzaren sektorea profesionalizatzeko eta kultura eta sormen ekosistema indartzeko. Ildo horretatik, bi erakundeek konpromisoa hartu dute elkarrekin lan egiteko, ekintzailetza, berrikuntza eta lehiakortasuna hobetzen lagunduko duen ingurune bat sortzeko, eta, horrela, eskualdearen eta lurraldearen garapen sozioekonomikoan laguntzeko.
