Herriartekoa ongi hasi dute esku huskako pilotariek
Hernaniren kontra jokatu dute final laurdenetako joanekoa, haien kantxan. Kadete eta jubenilek erraz irabazi dute, baina helduak ez dira lan erdietara iritsi.
Iazko Herriartekoaren irudia. Herriarteko txapelketa hasi dute asteburuan Oiartzun ordezkatuko duten pilotariek. Ostiralean Hernaniren kontra neurtu zituzten indarrak, arerioen kantxan. Gauzak ongi hasi ziren Oiarpekoentzat. Etxeberria eta Zelaiaran kadeteek erraz irabazi zuten final laurdenetako joaneko estreinako partida: 3-22 nagusitu ziren.
Antzeko bidetik joan ziren Etxeberria eta Leonet, 7-22 menpean hartu baitzituzten hernaniarrak. Senior Mailan, berriz, ifrentzua izan zuten oiartzuarrek, 22-5 galdu baitzuten pasa den ostiralean etxeko gisa jokatu zutenen aurka.
Itzuliko partidak datorren asteburuan jokatuko dituzte, Madalensoron, zehazteke dagoen egun eta orduan. Abantailarekin joango dira oiartzuarrak, 1-2 eta hamazazpi tantoko aldearekin.
Beste partidak
Oiarpek ohiko martxan jarraitzen du, eta Herriarteko partidez gain, beste zortzi jokatu zituzten. Bost irabazi zituzten. Asteburuko partida guztien emaitzak ikusteko, egin klik esteka honetan.
