Lanbarren industrialdeko sarrera errepidea itxiko dute etzi, gauez
Asfaltatze lanen ondorioz, errepidea itxita egongo da asteazken gauetik ostegun goizera arte. Aldundiak ordezko bideen berri eman du.
![lanbarren sarrera](https://oarsoaldea.hitza.eus/site/files/2024/05/lanbarren-sarrera.jpg)
Asfaltatze lanak egingo dituzte GI-3632 foru-errepideko zoruan, Lanbarren industrialderako sarbidean. Kaltetutako zatia konponduko dute asteazken gauean; ondorioz, errepidea erabat itxiko dute bi noranzkoetan (Iturrin eta Lanbarren biribilguneen artean).
Ekainak 5 gauean egingo dituzte lanak, beraz, 22:00etatik hurrengo eguneko 06:00 arte itxita egongo da bidea. Errepidea zirkulaziorako itxita dagoen bitartean, GI-636 foru-errepidetik ezin izango da Lanbarren industrialdera sartu ezta bertatik atera ere. Ordu tarte horretan, zirkulazioa Gurutze auzotik desbideratuko da, eta ordezko bi ibilbide gomendatu ditu Gipuzkoako Foru Aldundiak:
- Lanbarren industrialdetik datozenentzat: GI-3632 errepidea hartu Gurutze auzora iritsi arte, eta gero GI- 2134 errepidetik jarraitu Oiartzunerako noranzkoan Arraguako biribilguneraino jarraian GI-636 errepidera sartu ahal izateko.
- GI-636 errepidetik Lanbarren industrialdera doazenentzat: Lartzabalgo biribilgunean irtetea gomendatzen zaie, GI-2132 errepidetik jarraitzea Arraguako biribilguneraino eta gero GI-2134 errepidea hartzea Gurutze auzoraino, GI-3632 errepidetik sartu eta industrialdera iristeko.