Publikoa babestea ezinbestekoa
Adinekoen erresidentzietako egoera larria eta "gizagabea" lehen lerroan izan dute, zaintza publiko unibertsal duinaren bermea, pentsio duinak ziurtatzeko eskaera edota osasungintza publiko duinerako aldarria izan duten bezala.
Duintasunak kalea hartu du berriro Berriro hartu du kalea Duintasunak. Aurreko hilabetean bezala, gaurko protestan ere, Sanmarkosene eta Jesusen Bihotza zaharren egoitzetako egoerak hartu du protagonismoa. Pentsio duinen aldeko mobilizazioa, bi egoitza horietako langile eta senideek zeramaten pankartak zabaldu du. Gaur zuten borrokaldi horretako lehen fasearen azken eguna; orain, bide instituzionalari ireki dizkiote ateak herri eragileek konponbide lasterra eta duina eman diezaioten auziari. Gipuzkoako Foru Aldundiari hilabeteko epea emango diote, eta egoera larriari irtenbidea eman ezean, mobilizazioei ekingo diete berriro.
Adinekoen erresidentzietako egoera larria eta “gizagabea” lehen lerroan izan dute, zaintza publiko unibertsal duinaren bermea, pentsio duinak ziurtatzeko eskaera edota osasungintza publiko duinerako aldarria izan duten bezala. Jakin badakite horiek guztiak bermatzea, herritar ororen ongizatea bermatzea dela, bizitza duinak daudelako kolokan.
Eskaera horiekin lotuta, Europara begira jarri dira gaurko protestan pentsiodunak. Datorren igandean Europako Parlamenturako bozak izango dira eta eskaera zehatza egin diete alderdi politikoei, “Europako Batasuneko herrietan pentsio sistema publikoak bermatzeko egiten dugun eskaera zuen jarduera programan sartzea eskatzen dizuegu, bai hauteskunde kanpainan, bai Europako hurrengo agintaldian ere”. Gutxieneko pentsio nahikoak, genero arrakala amaitzea, ordezkapen tasa murriztea eragoztea, eta 40 urte kotizatuta dituzten erretiro aurreratuaren koefiziente murriztaileak indargabetzea. Horiek Duintasunak gaur egin dituen eskaera zehatzak.
Gizarte demokratiko baten “funtsezko” betebeharra dela pentsio publiko duinak bermatzea herritarrei beren bizitzako azken urteetan zalantzarik ez du pentsiodunen elkarteak, “pertsona guztiek bizi baldintza duinak izan ditzaten, aberastasuna ekitatez banatuta. Horrela ez egitea Europa soziala eta herrien oinarriak haustea da”.
Beste Europa bat posible dela sinistuta azaldu dira, eta Europa eraikitzeko dauden “proiektu antidemokratikoen” aurrean “ez etsitzera” deitu du, “pertsonen eta herrien Europa posible delako”.
