Txostek Antxin Ezkerroren izena jarri dio pala txapelketari
Datozen bi asteburuetan jokatuko dute Antxin Ezkerro Memoriala. Euskal Herriko eta inguruko palistak arituko dira.
Madalensoron eta Haurtzaron izango dira partidak [Arg.: instagram.com/txostoiartzungo.p.k.e]. Txost pilota elkarteak datozen bi asteburuetan egingo du urteroko pala motzeko txapelketa. Jakinarazi dutenez, Antxin Ezkerro Memoriala izena jarri diote txapelketa horri. “Berriki hil zitzaigun Antxin Ezkerro pilotariari zorretan ginen guregatik egin zuen lan guztiagatik. Hori dela eta, bere omenez jarri diogu Antxin Ezkerro Memoriala izena txapelketari”, azaldu dute.
Izena aldatzeaz gain, “bultzada” bat eman nahi izan diote txapelketari. Horretarako, Senior Mailako pala motzeko partidez gain, beste bi kategoria sortu dituzte. Alde batetik, emakume seniorren paleta larruzko partidak. Bestetik, 17 urtetik beherako txapelketa ere gehitu diote, erreminta eta pilota berarekin.
Txapelketaren formatua bi egunetakoa izango dela iragarri dute. Hilaren 8an eta 15ean izango dira partidak. Lehen egunean final zortzirenak eta final laurdenak jokatuko dituzte, egun osoan zehar. 15erako utziko dituzte finalerdiak eta finala.
Antxin Ezkerro Memorialeko partidak Madalensoron eta Haurtzaro Ikastolako pilotalekuan jokatuko dituzte, 09:00etan hasi eta 19:00etara arte.
Bizkaia, Nafarroa, Argentina, Iparralde, Landak, Bearno eta Gipuzkoako pilotariak hurbilduko dira Oiartzungo pilotalekuetara.
