Irulegiko aztarnategira joateko txangoa antolatu du udalak
Uztailaren 14an izango da irteera, eta uztailaren 5a izango da izena emateko azken eguna. 59 lagunentzat dago lekua, eta doan izango da.
Iazko txangoak izan zuen arrakastari so, Irulegiko aztarnategira bisita berri bat antolatu du Oiartzungo Udalak uztailaren 14an. Manuel Lekuona bibliotekako geltokitik abiatuko da autobusa 8:30ean, eta Oiartzundik Ilundaingo aparkalekura joango dira. Oinez igoko dira Irulegi mendiko aztarnategira Aranzadiko kideen laguntzaz; eta, bertan, arkeologoek proiektuaren eta indusketa lanen azalpenak emango dituzte. Buelta 14:30erako egitea aurreikusten dute.
Irteeraren antolatzaileek ohartarazi dute bide aldapatsua dela, eta gailurrera igotzeko 150 eskailera daudenez mendiko arropa, oinetako erosoak, ura eta hamaiketakoa eramatea gomendatu dute. Horretaz gain, azaldu dute bisita ez dagoela aniztasun funtzionala edota mugikortasun murriztua duten pertsona batzuentzat egokitua, eta komeni dela gutxienez zortzi urte izatea.
Doan izango da ibilaldia eta 59 lagunentzat dago tokia. Izena udaletxean, 943 49 01 42 zenbakian edo helbide honetara idatzita eman beharko da. Uztailaren 5a izango da izena emateko azken eguna.
