Pala Txapelketa Irekiak baditu aurtengo txapeldunak
Oiartzungo bikote bat Hirugarren Mailako finalean lehiatu da, baina ezin izan dute txapela lortu. Sari banaketa eta omenaldia izan dira azken ekitaldian.
Finalistak eta haiek ikustera joan zirenak, partidak bukatu ondoren. Bukatu da Euskal Herriko Pala Txapelketa Irekia. Giriziak antolatzen duen txapelketaren 40. ekitaldia izan da aurtengoa, eta otsaila hasieratik astebururo jo eta ke lehian aritu ondoren, larunbatean iritsi zen onenei txapela janzteko momentua.
Gizonen hiru mailetako eta emakumeen txapelketako finalak jokatu zituzten hilaren 1eko goizean. Oiartzungo bikote batek txapela janzteko aukera izan zuen Hirugarren Mailan, baina gutxigatik galdu zuten Markos eta Bereziartuak osatutako bikoteak. Landa eta Olazabalek lau tantogatik irabazi zieten.
Gizonekin jarraituta, Bigarren Maikan, Errasti eta Galarraga izan ziren onenak, eta Lehen Mailan, Arizmendi eta Arriaga. Emakumeen txapelketari dagokionez, Agirre eta Murua izan ziren onenak. Partidak maila handikoak izan ziren, eta nahiko orekatuak.
Bukatu zirenean, sariak banatu zituzten finalisten artean, eta omenaldirako txanda izan zen. Luis Bidegain Dorremoz pilotari ohiari eskerrak eman nahi izan zizkioten antolatzaileek, urte hauetan guztietan egindako lana eskertzeko.
Bertan izan ziren finalistak, antolatzaileak eta udaleko ordezkariak, baita Ander Imaz eta Ugaitz Susperregi Oiartzungo pilotariak. Girizia elkartearen pilota sailak guztien parte-hartzea eskertu du.
Finalen emaitzak
Gizonen Hirugarren Maila
- Landa — Olazabal / Markos — Bereziartua: 25-21.
Gizonen Bigarren Maila
- Errasti — Galarraga / Urrutia — Nuin: 25-17.
Gizonen Lehen Maila
- Arregi — Huegun / Arizmendi — Arriaga: 21-25.
