Altzibarko etxebizitzen oinarrian zuzenketa bat egin dute
56.094,50 eurora eguneratu da gehieneko diru-sarreren muga, aurrekoan baino 6.000 euro gehiago. Horregatik baztertu zituztenak, zerrendetara.
Pasa den asteko plenoan onartu ziren Altzibarko hamabi etxebizitza tasatuetan izena eman dutenen zerrenda. Otsailean onartutako oinarrietan 50.000 euro ezarri zuten gehienezko diru-sarreren muga gisa. Hala ere, oinarriak eguneratu dituzte, eta 56.094,50 eurora igo da kopurua.
Etxebideren webgunean argitaratutako kopuruagatik egin dute aldaketa, eta Altzibarko zerrendari aplikatu. Modu horretan, hasierako zerrendan behin-behinean baztertzekoak ziren bizikidetza unitateak onartu dituzte (udalaren webgunean ikusi daiteke zerrenda zuzenduta), baldintza hau eta gainontzeko denak betetzen dituztelako.
Gaineratu dutenez, 50.000 eurotik 56.094,50 euro arteko gehieneko diru-sarrera haztatuak dituzten eta eskaera aurkeztu ez zutenei aukera emango zaie eskaera egiteko. Hamabost eguneko epea izango dute horretarako, Gipuzkoako Aldizkari Ofizialak argitaratzen duenetik. Gainerako baldintza guztiak ere bete behar dituzte.
