Boleibolarentzat egokitutako aterpea
Errenteriako Udalak hobekuntzak egin ditu kirol instalazioetan boleibola sustatzeko. Pozik azaldu da Ttantta Oarso Boleibol taldea hobekuntza horiekin.
Mazizior, Lizeaga,Bengoetxea, Nieto, Olaizola, Lazkano eta Holgado Boleibola sustatze aldera hobekuntzak egin ditu Errenteriako Udalak hainbat kirol instalazioetan. Hala jakinarazi du gaur Leire Mazizior Kirol zinegotziak Ttantta Oarso Boleibol taldeko lehendakari Nerea Lizeaga, Kirol zuzendari tekniko Vicente Holgado, eta jokalari Eider Nieto, Enara Lazkano, Araia Bengoetxea, eta Uxue Olaizolarekin batera egindako agerraldian. Urtebete beteko du hilabete honetan Ttantta kirol elkarteak, Errenteria-Oreretan boleibola sustatzeko sortutako lehena da, gainera, eta une honetan 75 jokalari ari dira bertan, guzti-guztiak emakumeak.
Koldo Mitxelena institutuaren gimnasioan egiten dituzte entrenamenduak, eta partidak, berriz, orain arte Orereta Ikastolak utzitako estalpe batean, “eguraldi txarrarekin eta hotzarekin ez ziren baldintza onenak partidak egiteko”, azaldu du Maziziorrek.
Hori horrela, Beraungo pilotalekuko pista balioztunean hiru pista berri prestatu dira boleibolean aritzeko, udalaren esku hartzeari esker; pista bakoitzak bere ekipamendua du. 8.000 euro bideratu ditu horretara udalak, eta egindako hobekuntzei esker, instalazio horiek modu intentsiboagoan erabili ahal izango dira herriko boleibol elkarteak entrenamenduak eta lehiaketa partidak jokatu ahal izango dituelako udatik aurrera.
Ez da udalak egin duen hobekuntza bakarra. Izan ere, Koldo Mitxelena Institutuaren instalazioetan 3.300 euroko ekipamendua jarri du eta gimnasioa erabiltzeko ordutegia zabaldu, klubeko talde berrien entrenamenduak bertan egin ahal izateko datorren denboraldiari begira.
Talde guztiak, emakume kategorian
Gaur gaurkoz bost talde ari dira Ttantta Oarso Boleibol Taldean: Bi Haur Mailan, beste bi Kadete Kategorian, eta bat Gazte Mailan. Den-denak, emakumeen kategorian ari dira.
Lizeagak eskerrak eman dizkio udalari Beraungo pilotalekua boleibolean aritzeko egokitu izana, “gaurtik leku honetan hiru pista egongo dira, klubeko jokalariek kirol hau baldintza egokietan egiteko aukera izan dezaten”. Espazio horrek, gainera, aukera emango dio taldeari bolei pista ikastaro trinkoak eskaintzeko. Lizeagak eman ditu datuak, “dagoeneko 80 gaztek baino gehiagok eman dute izena eta plazak berehala agortu dira”. Ziur da gainera kirol taldeko lehendakaria, espazio berria izateak, jokalari eta talde kopurua haztea ahalbidetuko duela.
Urtebete baino ez da Oarso Bolei Taldea sortu zutenetik, eta “aisa” gainditu dituela arduradunen aurreikuspenak aitortu dute Lizeagak eta Holgadok, “60 jokalari baino gehiago dituzten bost talde osatu ditu, partida profesional baterako txangoa antolatu dugu eta Gipuzkoako Federazioko Kluben ligan zein hainbat txapelketetan parte hartu dugu, horietako batean Haurren Mailan lehen postua lortuz”.
Argi esan dute udalaren laguntzarik gabe “ez litzatekeela posible izango”. Eskerrak halaber, jokalariei, haien familiei, eta zuzendaritzako kideei, “haien inplikazioa ere, ezinbestekoa izan da. Erronka handia da, baina arrunta aparteko bilakatzeko satisfazioa da saririk handiena”.
Herrian ere boleibola sustatu nahian
Bi instalazioetan berrikuntzak egin ditu Errenteriako Udalak boleibolean jardutea errazagoa egiteko herriko taldeari, baina hortik harago era joan da kirol hori sustatzeko saiakeran. Sare eramangarri bat erosi du Gernika plazako erabilera anitzeko pistan jartzeko eta nahi duen herritar orok erabili dezan.
Lekuona Fabrikako kantinan jaso beharko dute sarea boleibolean aritu nahi dutenek Gernika plazan, kosturik gabe. Han jasota, pistan bertan jartzea izango dute, betiere libre baldin badago, eta kirol horrekin gozatu. Bukatutakoan, jaso eta Lekuona Fabrikako kantinan itzuli beharko dute sarea.
Duela urtebete jakinarazi zuten Oarso Boleibol Taldea sortu zutela, herrian kirol horrekin lotuta sortutako lehena. Ibilbide laburra du, baina erantzun bikaina jaso du eta aurreikuspen denak gainditu. Bertan ari diren jokalariek baina denbora luzeagoa daramate boleibolean: “Hemen inguruan talderik ez zegoenez Hernanira joaten ziren entrenatzera, hango boleibol taldera”. Gurasoak, eta zehatzago jokalari horien amak hasi zirela mugitzen Errenteria-Oreretan boleibol elkartea sortzeko nabarmen jarri du Jexux Mari Ertzibengoa Errenteriako Udaleko kirol teknikariak: “Batera eta bestera hasi ziren leku egokirik ote zegoen bilatzen entrenamenduetarako. Azkenean Koldo Mitxelena Institutuko gimnasioa egokia iruditu eta udalari eskaera egin zioten”.
