Aurki hasiko da 12 eta 16 urte artekoentzako pala txapelketa
Antxon egingo dute kirol ekimena, Ibaiondon. Horrela, barrutian adin guztietarako pala eskaintza bermatuko dute.
Eskubidean egitasmoaren baitan, Antxoko DBHko 1. eta 2. mailako ikasle nerabeek pala txapelketa antolatu dute. Hala, 12 eta 16 urte bitarteko gazteek ekainaren 15era, larunbatera, arte izango dute izena emateko epea zabalik. Horretarako, Antxoko Txema goxoki dendara hurbildu beharko dute.
Hiru hitzordu nagusi izango dituzte gazteek finalaren aurretik. Lehenengo partida saioa ekainaren 18an, asteartean, jokatuko da. 15:30etik 18:30era ariko dira, Ibaiondon. Ekainaren 25ean (goizez) eta uztailaren 2an (15:30etik 19:00etara) ariko dira ere, leku berdinean. Saio guzti horien ondoren, finala lehiatuko duten jokalarien azkeneko hitzordua uztailaren 5ean finkatu dute. Goizeko 11:00etan, izan ere, pala txapelketaren irabazlea iragarriko duen buruz burukoari ekingo baitzaio.
Ekimen honen bidez, adin guztietarako pala eskaintza bermatu da Antxon. Aurretik, abian zeuden jada 8 eta 12 urte artekoentzat pala txapelketa, eta barrutian beste bi lehiaketa antolatu ohi dira: Papineko Gazteriak, batetik, eta Axular tabernak beteranoentzat, bestetik.
