Auzo batzarrak, Galtzaraborda eta Iztieta-Ondartxora
Galtzarabordako topaketa astelehenean izango da, eta Iztieta-Ondartxokoa, berriz, asteartean. Biak ala biak 18:00etan hasiko dira.
Irudia otsailean Pontikan egin zen auzo batzarrekoa da. Auzotarren premia eta kezkak jasotzeko asmoz, auzo batzarren zikloarekin jarraituko du Errenteriako Udalak datorren astean. Hilaren 10ean (astelehenean) Galtzarabordako auzotarrekin izango da topagunea, 18:00etan hasita, auzoko erretiratuen elkartean (Urdaburu kalea, 23). Han Aizpea Otaegi alkatea eta Bernar Lemos, Eneko del Amo eta Yolanda Martin zinegotziak izango dira azalpenak ematen. Asteartean (hilaren 11n), berriz, Iztieta-Ondartxoren txanda: Gurekin Auzo Elkartearen egoitzan emango dituzte argibideak (18:00etan hasiko da) Aizpea Otaegi alkateak, eta Bernar Lemos, Emeko del Amo eta Maite Gartzia zinegotziek.
Martxo, apiril eta maiatza artean etena izan dute auzo batzarrek, Eusko Legebiltzarrerako eta Europako Parlamentuko hauteskundeengatik. Hala, horiek pasata, berriz ere berrekin diete auzoetako biltzarrei. Auzoz auzo garatuko diren egitasmoak azaltzen ari dira udal arduradunak, baita herritarren ekarpenak jasotzen ere. Hala, datorren asteko bien ondotik, falta diren besteetara joango dira hautetsiak zehaztasunak ematera. Egiteke dauden horietara ager daitezela eskatu die udalak tokian tokiko bizilagunei.
