Errugbizale gazteena izango da Mikel Odriozola estadioa
Igandean, Oreretako Errugbi Eskolen Topaketa egingo dute Beraungo zelaian. 150 jokalari gazte espero dituzte, sei taldetakoak.
Irudia, eskolen artean Irunen egindako topaketa batena da.Txingudi RT Azken zatira iritsi da Oreretako Errugbiaren I. Astea. Asteburuan egingo dituzte falta diren bi ekitaldiak. Jendetsuak izango dira. Izan ere, bihar (hilak 8, larunbata) 11:30etik 13:30era Errugbi Street jarduera egingo dute Agirre Lehendakariaren plazan, eta etzi (igandea) Errugbi Eskolen Topaketa jasoko du Beraungo Mikel Odriozola estadioak: 150 errugbizale gazte espero dituzten han. “Hainbeste jende bilduko duen ekitaldi hori egitea erronka da gurea bezalako talde txikiarentzat. Baina era berean herriko bazter guztietara errugbia eramateko prest gaudela ikusten ari gara”, azaldu du Orereta Rugby Taldeko kide eta astearen koordinatzaile den Xabier Sanchez Agirregomezkortak. Talde horrek eta Oarsoaldeko Rugbyzaleak elkarteak antolatu dute astea.
Igandeko topaketa 12:00etan hasiko da. Sei taldetako kideak, 10, 12 eta 14 urtez azpikoak denak, izango dira Mikel Odriozolan: Bidasoko Txingudi Rugby Clubekoak, Bartzelonako Universitari Club taldekoak, Donostiako Bera Berakoak, Zarauzko Rugby Taldekoak, Soraluzeko Soragazteak klubekoak, eta Oreretako Rugby Taldekoak. Jokalari gazteak 150 izango dira, baina laguntzaile eta enparauekin 200 lagun espero dituzte estadioan.
Topaketa bitartean haur txokoa izango dute txikienek, haiek ere kirol horretan hastapeneko urratsak egin ditzaten. Nola ez, hirugarren zatian, zer jan eta edan izango dute partaideek.
