Dantza asko, izerdia, sagardo ona eta musika bihar
Euskal Jaia izango da bihar herrian. Bertako ekitaldi nabarmenenak bi izango dira: Lezoko Dantzazaleen goiz eta arratsaldeko saioak, eta Tiñelu elkartearen Sagardo Festa.
Euskal Jaia bihar, egun osoz, Lezon. Hainbat osagai izango ditu egunak, baina horietatik nabarmenenak bi dira: Lezoko Euskal Dantzazaleen ekitaldiak, eta arratsaldeko Sagardo Festa. Egun gozoa izango dute lezoarrek; ez bakarrik beraiek, baita inguruetako herrietatik gerturatzen diren bisitariek ere.
Hamabost urte bete dituzte aurten Lezoko Euskal Dantzazaleek. Hasi zirenetik, herrian ez da festarik euren partaidetza eta kolorerik gabe. Hala izango da bihar: II. Dantzari Festa egingo dute Euskal Jaiaren barruan. «Urte biribila da guretzat aurtengoa. Gainera dena oso ondo ateratzen ari zaigu. Bihar, dantza herri osora zabaldu nahi dugu, mutxikoen eta euskal dantza tradizionalen bidez», esan du Gurutze Alberdik, Lezoko Dantzazaleak taldeko kideak. Izan ere, goizean herriko lau plazatan saioak eskainiko dituzte lezoarrek, nahiz herrira etortzekoak diren dozenaka eta dozenaka dantzariek. «Saiatu gara Euskal Herriko txoko ezberdinetatik erakartzen dantzariak. Ipar Euskal Herrikoak, Nafarroakoak eta inguruko herrietakoak izango dira gurean», zehaztu du Alberdik. Iritsiko direnen artean, Baztandik (Nafarroa) datorren Bertzez Hainbertzez taldekoak nabarmendu ditu lezoarrak, Mutil dantza egin, eta emakume zein gizonei irakatsiko dietelako.
Dantzariak, taldeka banatuta izango dira plazetan, eta eguerdi partean bilduko dira Gurutze Santuaren plazara. Ondoren festa giroan Lezo Herri Eskolako jolastoki estalian bazkalduko dute, eta arratsaldean Sagardo Festara batuko dira: mahai gaineko dantza saioa egingo dute dastaketa hasteko, tragoxka eta tragoxka artean Mutil dantza zabalduko dute, eta sagarraren zukuaren festa bukatzeko, Larrain dantza-ri ekingo diote.
Sagardo Festa
Euskal Jaiaren beste osagarri handia, Tiñelu elkartearen Sagardo Festa izanen da. 18:00etatik aurrera, herriko baserrietako ekoizpena dastatzeko aukera izango dute Gurutze Santuaren plazan bilduko direnek. Tiñeluko kideek jakinarazi dute hamabi sagardo ezberdin dastatu ahal izango direla
GOIZA
• 09:30. Diana Munttar Lezoko Txistu Taldearekin.
• 11:00. Euskal Dantzazaleen erromeria Goiko Plazan, Gurutze Santuaren plazan, Karlos Saldise plazan, eta Lopene plazan,
• 12:00. Herri kirolak Gurutze Santuaren plazan. Aizkolariak: Maika Arostegi eta Irati Astondoa. Harri jasotzaileak: Mikel Urra eta Jokin Eizmendi.
• 13:30. Dantza taldeen topaketa Gurutze Santuaren plazan.
• 14:30. Herri bazkaria Lezo Herri Eskolako jolastoki estalian.
ARRATSALDEA
• 18:00. Sagardo Festa eta Larrain dantza (19:30) Gurutze Santuaren plazan.
• 20:00. Ixtaklok elektrotxarangaren kalejira.
• 23:00. Kontzertua Gurutze Santuaren plazan: Edu Zardoya, Sala eta Garazi.
