Odola emateko aukera, Elorsoron
Oiartzungo odol emaileen taldeak hilaren 18rako (asteartea) odola emateko saioa antolatu du. Elorsorora lekualdatu dute elkartasun jarduera.
Elorsoro kiroldegiko bilera gelara lekualdatu dituzte odol emate saioak. Oiartzungo odol emaileen taldeak jakinarazi du hilaren 18an (asteartean) berriz ere odola emateko aukera izango dela herrian. Elkartasun keinua egiteko aukera 16:30ean hasi eta 20:10ak aldera bukatuko da. Erne. Leku aldaketarekin dator ekainekoa: Elorsoro kiroldegiko bilera gelan atonduko dute odola emateko espazioa. Aurrerantzean ere han izango dira herritarren zain.
Aurrez txanda eskatu behar dute odola eman nahi dutenek. Horretarako telefono dei bat besterik ez da egin behar, 943 00 78 85 edo 943 31 70 91 telefono zenbakietara. Oiartzungo taldekoek oroitarazi dute emaile berriak behar direla, eta batez ere, gazteei egin diete dei odola emateko. Apirileko saioko datua baliatu dute emaile berriak eskatzeko: 29 oiartzuar joan ziren apirilean odola ematera, bat bera ere ez berria.
