500 botoren aldearekin, EH Bildu nagusi Pasaian
2.010 botorekin, Orain Errepublikak zerrenda izan zen atzoko garailea Pasaian. Bigarren PSOE izan zen eta hirugarren CEUS.
2019ko hauteskundeetan bezalaxe, atzo ere EH Bildu izan zen garaile Pasaian. Orduko emaitzak errepikatzeko gai izan ez bada ere, koalizio subiranista erraz gailendu da. 2.010 boto eskuratu zituen atzoko Europako Parlamenturako hauteskundeetan Orain Errepublika zerrendak (zerrendako partaide da EH Bildu). Boto guztien %36,31 lortu zituen taldeak. Bigarren talde bozkatuena PSOE izan zen atzo (1.508, %27,24 ) eta hirugarren jeltzaleak ordezkatzen zituen CEUS zerrenda izan zen (874, %15,79).
Abstentzioa handia izan zen atzo, %54,84koa zehazki. Botoa ematera deituta zeuden 12.316 pasaitarretatik 6.755ek abstentziora jo zuten. 2019arekin alderatuta, %14 igo da abstentzioa, 2019an %40,21ekoa izan baitzen. Talde guztiek sumatu dute beherakada hori, baina EAJk eta Podemosek bereziki. Jeltzaleek 900dik gora boto galdu dituzte 2019koekin alderatuta, eta Podemosek, Sumar-en botoak gehituta ere, 700dik gora boto gutxiago jaso dituzte.
Hauek dira emaitzak (parentesi artean 2019koak ikus daitezke):
- EH Bildu (Orain Errepublikak): 2.010 boto, %36,31 (2.211, %29,99).
- PSOE: 1.508 boto, %27,24 (1.593, %21,61).
- CEUS: 874 boto, %15,79 (1.788, %24,25).
- PP: 353 boto, %6,37 (265, %3,59).
- Sumar: 197 boto, %3,55 (2019eko hauteskundeetan ez zen izan).
- Podemos: 189 boto, %3,41 (1.100, %14,92).
- Vox: 120 boto, %2,16 (50, %0,68).
