Zenbakirik ez duten Atez ateko kuboak erretiratzen hasiko dira etzi
Edukiontzietan itsasteko zenbakia duen pegatina udaletxean jaso daiteke. Etzirako kubo horiek zenbakirik ez badute, kendu egingo dituzte.
Hondakin organikoaren edukiontzi bakoitzak zenbaki bat izaten du kuboa eta zintzilikarioa lotzeko; hondakin bilketako langileek kode horri esker jakiten dute ontzia hustu ondoren non utzi behar duten.
Denborak aurrera egin ahala, ordea, ontzietako batzuk zenbakiaren pegatinak galdu dituzte, eta udalak ohar baten bidez azaldu duenez, zenbakirik gabeko kuboetan oharrak jarri dituzte azken hilabeteetan eskatuz Atez ateko bulegoetan kodea eskuratzeko.
Asteazkenetik aurrera, ordea, koderik ez duten kuboak erretiratzen hasiko direla ohartarazi dute.
Doneztebe plazan dagoen Hirigintzako eraikineko harreran jaso daiteke edukiontzietan itsasteko zenbakia duen pegatina, astelehenetik ostiralera, 8:00etatik 14:30era.
Zalantzak argitzeko, aldiz, 900 49 11 11 zenbakia baliatu daiteke.
