Xanistebanen kartel iragarlea eta txupina botako dutenak iragarri dituzte
Xanistebanetako Jai Batzordeak Igor San Joseren kartela onena dela erabaki du. Artaso elkarteak botako du suziria, 50. urtemuga dela eta.
Epaimahaikideak, kartel onena aukerateko lanetan. Xanistebanetako Jai Batzordeak festen aurretik derrigorrezko diren bi erabakiren berri eman du. Alde batetik, aurtengo festak zein kartelek iragarriko duten jakinarazi du. Igor San Jose Izagirrerena izan da 45 kartelen artean onena (behean ikus daiteke), haien iritziz. Iaz baino zortzi lan gehiago jaso dituzte, eta epaimahaiak haien guztien maila goraipatu du.
San Josez gain, beste hainbat sari banatu dituzte. Honakoa izan da palmares osoa:
- Irabazlea (600 euro): Igor San Jose Izagirre.
- Lehen oiartzuarrari saria (300 euro): Eneko Salaberria Gonzalez.
- Akzesitak (50 euro): Udane Ansa Iragorri eta Irati Iparragirre Villar.
- Ehuntze Sormen Espazioak eskainitako saria: Maren Aginaga Bote.
Abuztuaren 1eko kultur ekitaldian banatuko dituzte sariak, eta aurkeztutako lanak pleno aretoan ikusi ahal izango dira, festetan zehar.
Artasorentzat suziria
Xanistebanetako Jai Batzordeak, halaber, erabaki du Karrikako Artaso elkarteak botako duela festei hasiera ematen dien suziria. Izan ere, 50 urte bete dituzte aurten.
Karrikako festak zein herriko beste jai eta deialdiak antolatzeko egindako lana eskertu nahi izan du Xanistebanetako Jai Batzordeak.
