ABB Niessengo langileak mobilizazioekin hasi dira
Hitzarmen berria sinatzeko dinamika iragarri zuten pasa den astean, hitzarmenaren negoziazioa desblokeatzeko.
Gaur goizean egin duten elkarretaratzearen irudia [Arg.: @laboarsobidasoa]. ABB Niessen enpresako langileek lehenengo mobilizazioa egin dute gaur goizean, enpresatik metro gutxira, beraien aldarrikapena ikusgarriagoa den leku batean. LAB, ELA eta UGT sindikatuek osatzen duten langile batzordeak deituta, elkarretaratzea egin dute, hitzarmen berria eskatzeko asmoz.
Honakoak dira egin dituzten aldarrikapen nagusiak: soldatak, zaintza egoeretarako lizentziak, lanaldi murrizketa, 50 urtetik gorako langileen gaueko txanda kentzea, eta aldi baterako lan kontratuak erregulatzea. Enpresa batzordeak jakinarazi duenez, hitzarmen berria lortzeko lanketan bi hilabete daramate, baina “blokeatua” dago egun, “aurrerapenik gabe”. Egoera horrek bultzatu ditu mobilizatzera.
Greba partzialak egiteko bidea hartu dute. Gaur —hilak 11, asteartea—, bihar eta etzi ordubete utziko diote lan egiteari hiru txandetan.
