Bidegorri sarea hobetzeko deia, Eguzki talde ekologistaren eskutik
Hiru dira Eguzki talde ekologistak Lezoko Udaletxean aurkeztu dituen eskaerak. Gaur egungo bidegorri sarea hobetzea dute helburu.
Eguzki talde ekologistak Lezoko bidegorriarekin lotura duten hiru eskaera aurkeztu ditu udaletxean, eta eskaera horiek gaur egungo sarea hobetzera daude bideratuta.
Lehenengo eskaera duela gutxi GI-636 errepideko biribilgunean, Lezoko sarreran, jarri dituzten seinaleei buruzkoa da. Eguzkikoek seinaleak jartzea bidegorri sarearen funtzionaltasun onerako beharrezkotzat jotzen dute, baina, kasu honetan, GI-636 errepidearekiko paralelo Pasaia-Donostia noranzkoa adierazten duen seinalea okerra dela azpimarratu dute: “Tarte hori ez da bizikleta planaren parte, eta, gainera, oso urrun dago bidegorri baten gutxieneko baldintzak betetzetik. Horregatik, lehenbailehen kentzeko eskatzen dugu”.
Bigarren eskaera, aldiz, Renfeko geltokitik aipatutako biribilguneraino doan sare nagusiko bidegorri tarteari dagokio. Zati horren tarte batean urbanizazio lanak egiten ari dira Altzate izeneko eremuan, eta, auzo berrira sartzeko biribilgune berrirako lanek puntu batean Gipuzkoako Bizikleta Planean ezarritako sare nagusiaren trazadura itotzen dutela salatu dute. Ildo horretatik, beraz, gutxieneko zabalera mantentzeko beharrezko neurriak hartzeko deia egin dute.
Eta, azkenik, Eguzki talde ekologistakoek oharrean adierazi duten hirugarren eta azken puntuan diote aukera bat eman nahi diela loturarik gabe dagoen tarte bati, nahiz eta bidegorrien sare nagusiaren parte izan. Diotenez, sare hori Gipuzkoako Bizikleta Planaren bidez diseinatu eta 2013an onartu zuten. Talde ekologistak arazo horri aurre egiteko beharra ikusaraztea du helburu, tarte horretan sareari jarraitutasuna eta koherentzia emanez.
