Larunbatean irekiko dute udako igerilekua
Irailaren 15era arte egongo da irekita. Kiroldegiko bazkideek ez dute sarrerarik ordaindu beharko; denboraldiko txartela eskura daiteke.
Oiartzungo Udalak jakinarazi duenez, datorren larunbatean —hilak 15— irekiko dute udako igerilekua. Irailaren 15era arte egongo da irekita, eta egunero emango du zerbitzua, Xanisteban Egunean izan ezik. Ekaina, abuztua eta irailean 11:00etatik 20:00etara hartu ahal izango da bainua. Uztailean ordutegi zabalagoa izango du, 10:00etatik 21:00etara.
Horrez gain, belarra astero moztuko duela iragarri du udalak, erabiltzaileen erosotasuna handitze aldera. Iaz 17.000 lagun pasatu ziren bertatik, ur- edo eguzki-bainuak hartzera.
Denboraldiko bonua
Elorsoro kiroldegiko bazkideek ez dute sarrerarik ordaindu beharko. Gainerako erabiltzaileek bi aukera izango dituzte: eguneko sarrera erostea, edo denboraldiko abonamendua egitea.
Honakoak izango dira bonu horien prezioak: 138,21 euro (gurasobakarreko familiek edo familia ugariek 96,75 euro); helduen banakakoa 103,68 euro eta gazteen banakakoa 69,16 euro.
Eguneko sarreraren prezioa 4,49 eurokoa izango da 16 urtetik beherakoentzat; 5 urtetik beherakoek doan izango dute. 16 urte edo gehiago dituztenek 8,87 euro ordaindu beharko dituzte. Ohi bezala, sarrerak bosnaka erosteko aukera izango da aurten ere: 17,80 euroan gazteenak eta 35,34 euroan helduenak.
