Olatzar inguruko etxebizitzen eskaria aurkezteko epea, zabalik
Erregimen Tasatuko 24 eta Babes Ofizialeko 33 etxebizitza eraikiko dituzte Olatzar inguruan. Eskariak aurkezteko epea uztailaren 11 arte da.
Martxoaren 30ean onartu zuen Lezoko Udalak Olatzar inguruan Babes Ofizialeko 33 etxebizitza eta Erregimen Tasatuko 24 etxebizitza eraikitzea. Iragarkia Gipuzkoako Aldizkari Ofizialean argitaratu dute, eta, ondorioz, eskaerak aurkezteko epea ere zabaldu dute. Epe hori ireki dute dagoeneko, eta uztailaren 11 arte egongo da zabalik.
Gauzak horrela, etxebizitza bat esleitzeko eskabidea aurkeztu nahi duten lezoarrek aipatutako egunera bitartean egin beharko dute eskaera telematikoki -HO37 eskabidea aukeratuta- edo udalean, herritarrei arreta emateko zerbitzuaren bulegoetan.
Erregimen Tasatua
Orotara Erregimen Tasatuko 24 etxebizitza egingo dituzte, eta horietako bat mugikortasun urriko ezintasuna edo ezintasun psikikoa duten pertsonentzat gordeko dute.
Bestalde, zortzi etxebizitza hiru logelakoak izango dira, eta gainerako hamabostak, berriz, bi logelakoak.
Babes Ofiziala
Babes Ofizialeko etxebizitzen kasuan, berriz, 33 izango dira eraikiko dituztenak. Babes Ofizialeko kasuan ere gordeko dituzte mugikortasun urriko ezintasuna edo ezintasun psikikoa duten pertsonentzako etxebizitzak, baina bi bideratuko dituzte horientzat.
Horietaz gain, hiru logelako zazpi etxebizitza eta bi logelako 24 etxebizitza eraikiko dituzte.
Deialdia eta bete beharreko oinarriak hemen ikus daitezke.
