Errenteria "paralisi" egoeran dago PSE-EErentzat
Sozialisten esanetan, EH Bilduk ez du "kudeaketarako gaitasunik", ezta "lidergorik" ere.
Isaac Palencia PSE-EEren eleduna. Argazkia: PSE-EE Errenteriako PSE-EEk agintaldiaren lehen urtearen balorazioa egin du. Oraingoan ere gogorretik aritu dira sozialistak, eta EH Bilduri “gaitasun eta lidergo” eza egotzi dizkio, eta ondorioz, udalerria paralisi egoeran izatea leporatu. Isaac Palencia sozialisten eledunak egin ditu adierazpen horiek komunikabideetara bidalitako prentsa ohar batean.
Herritarren bizitza kalitatean eragin zuzena duten garbiketa eta mantenua, aparkalekuak, garapen ekonomikoa, eta segurtasuna aipatu ditu Palenciak eta koalizio subiranistari egotzi ez diela kontu horiei inoiz aurre egin serioski, “presazko erabakiak hartu behar dira ordea”.
Azken agintaldia hasi zenetik joan den urtebeteko epea, hainbat zerbitzu publikoren kudeaketa “kaxkarra” izan dela erantsi du Palenciak: “Beldurgarria izaten ari da kiroldegien azken urteetako kudeaketa, Fanderiako kiroldegiaren lanek atzerapen handia izan dute erabiltzaile asko zerbitzurik gabe utzita, eta kafetegiek urteak daramate itxita. Arduradun bakarra dute egoera horiek: EH Bildu”. Kale garbiketa eta zabor bilketa zerbitzuak prorroga egoeran daudela ere esan du sozialistak, “horrek kudeaketa egoki baten falta utzi du agerian”.
Proiektu berriak martxan jartzeko gaitasun falta duela gobernu taldeak ere esan du, “Aldakoenea, Barandiaran parkea, Olibeteko aparkalekua, adinekoentzako etxebizitzak, Ondartxoko eremu komunitarioa, Beraun kalearen birgaitzea eta Gaztañoko igogailua dira horietako batzuk. Aldakoenea eraikinaren kasua nabarmentzeko da. 2019rako bukatuta behar zuen, baina bost urtez atzeratu da irekiera, eta erdizka egin dute udalari ahaztu egin zitzaiolako goiko solairua irisgarria egitea. Onartezina da”.
Topoaren lurreratzean “utzikeria” dago Palenciaren iritziz. Harago jo du, eta 2011n lurperatze proiektua “geldiaraztea” leporatu dio EH Bilduri, eta ondoren ez bultzatu nahi izana. Aurreko agintaldietan bete gabeko proiektuak “desagertu” izana ere salatu du: “Galtzaraborda kiroldegia handitzea, aita Donosti, Maurice Ravel eta Irun kaleak birgaitzea, edota San Marko gotorlekua eta inguruak balioan jartzea”.
“Ardurak” bere gain hartzeko galdegin dio bukatzeko Palenciak EH Bilduri, “Errenteriari eragiten dioten arazo larriei erantzuteko. Norabide ladaketa beharrezkoa da, baita lidergo sendo bat ere erabaki ausartak hartzeko”.
